साकोर्डा भागातील रगाडा नदीचे पाणी अचानक दूषित होऊन हिरवेगार झाले आहे. याची माहिती साकोर्डावासीयांना मिळताच संतप्त झालेल्या शकडो लोकांनी आज सकाळी पंचायतीवर धडक दिली.
सरपंच प्रिया खांडेपारकर यांनी त्वरित ग्रामस्थांबरोबर बैठक घेतल्यानंतर प्रदूषित झालेल्या रगाडा नदीच्या पाण्याची देऊळमळ-साकोर्डा येथील पुलाकडे पाहणी केली. नदीचे पाणी आटल्याने ते संथपणे वाहत होते. पात्रातील संपूर्ण पाणी गडद हिरवेगार झालेले दिसत होते.
पानसी जलप्रकल्पातून रगाडा नदीचे दूषित पाणी थेट नळाला सोडले जाते. नळाला गढूळ, हिरव्यागार पाण्याचा पुरवठा होत असून पाण्याला मासळीचा वास सुटला आहे, असे एका महिलेने सांगितले.
हे पाणी प्यायल्याने घशात त्रास होऊ लागलाय. तसेच या भागात सर्दीच्या प्रमाणात वाढ झाली आहेत. डॉक्टरांनी सांगितले की, परिसरातील लोकांनी या पाण्‍यापासून दूर रहावे, अन्यथा ॲलर्जी होऊ शकते.
पाण्याचे नमुने पाठविले तपासणीसाठी
आरोग्य खाते, सार्वजनिक बांधकाम खाते व जलस्रोत खात्‍याने पाण्याचे नमुने घेतले असून ते प्रयोगशाळेत पाठविले आहेत. प्रकल्प बंद करून टँकरने गावाला पाणीपुरवठा करण्याची मागणी संतप्त लोकांनी केली आहे. धारबांदोडा पाणी विभागाचे कनिष्ठ अभियंता बाबशेट यावेळी उपस्थित होते. प्रकल्पाला दिलेला ना हरकत दाखला मागे घेणार आहे, असे सरपंच प्रिया खांडेपारकर यांनी सांगितले.
प्रदूषित झालेल्या रगाडा नदीबाबत पंचायत मंडळाने आता तरी गांभीर्याने पावले उचलली पाहिजेत. दूषित पाण्यामुळे नागरिकांना अनेक रोग जडण्याची भीती आहे. हा संवेदनशील विषय असून, तो जेव्‍हा पंचायतीकडे आला तेव्‍हाच त्यावर कृती करण्याची गरज होती. पंचायतीने खबरदारी घ्यावी, अन्यथा आम्हाला पुढील कृती करावी लागेल.- नीलेश मापारी, ग्रामस्‍थ (साकोर्डा)
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.