Teak Wood Smuggling At Assolda Curchorem: कुडचडे येथे शिशाच्या लाकडाची तस्करी रोखण्यात केपे वन खात्याच्या अधिकाऱ्यांना यश आले. अधिकाऱ्यांनी सुमारे 5 हजार किमतीचे शिशाच्या लाकडाचे दोन तुकडे जप्त केले. तर सागवान लाकडाची अवैध वाहतूक करणारा ड्रायव्हर तसेच एक कामगार तेथून पसार झाला.

केपे वन खात्याचे वन अधिकारी हरीश सांगोडकर यांनी दिलेल्या माहितीनुसार, शुक्रवारी शेल्टन फेर्नांडिस यांनी असोल्डा येथील वखारीत शिशाचे लाकूड कापण्यासाठी आणल्याची माहिती केपे वनखात्याला दिली असता आम्ही त्वरित घटनास्थळी भेट दिली.

याठिकाणी दोन युवक शिशाचे लाकूड वखारीत घेऊन जात असल्याचे दिसून आले. आम्हाला पाहून त्यांनी घटनास्थळावरुन पळ काढल्याचे अधिकाऱ्यांनी सांगितले.

सदर लाकूड सुमारे पाच हजार रुपयांचे असून आम्ही ते ताब्यात घेतल्याचे सांगोडकर यांनी सांगितले. यावेळी स्थानिक पंच फ्लोरिअन फेर्नांडिस यांनी सदर वाखारीत रोज बेकायदेशीर लाकूड कापण्यासाठी येत असल्याचे सांगितले.

सदर वाखारीवर कडक कारवाई करावी अशी मागणी फेर्नांडिस यांनी केली असून याविषयी आपण स्थानिक आमदार निलेश काब्राल यांच्याशी बोलणार असल्याचे त्यांनी सांगितले.