Panaji News : सार्वजनिक बांधकाम खात्याने विविध प्रकारच्या सेवेसाठी खात्याचे संकेतस्थळ तसेच ॲप उपलब्ध करून ऑनलाईन सेवा सुरू केल्या आहेत. ‘आत्मनिर्भर भारत स्वयंपूर्ण गोवा’ या उपक्रमातून लोकांना या सेवा देण्यात येत आहेत, त्यांचा लाभ घ्यावा.

झुआरी पुलाचे केबल स्टेडचे काम बाकी असून इतर काम पूर्ण झालेले आहे. त्यामुळे हा पूल येत्या सप्टेंबरपर्यंत वाहतुकीसाठी खुला होण्याची शक्यता आहे, असे मत खात्याचे प्रधान मुख्य अभियंता उत्तम पार्सेकर यांनी व्यक्त केले.

पार्सेकर म्हणाले की, केंद्र व राज्य सरकारने सुरू केलेल्या ‘आत्मनिर्भर भारत स्वंयपूर्ण गोवा’ या उपक्रमांतर्गत लोकांना साधनसुविधा अधिक सुटसुटीत देण्याचे ठरवले आहे. त्याचाच भाग म्हणून या खात्यातर्फे नळ जोडणी, सांडपाणी वाहिनी जोडणीसाठी, रस्ता कापण्यासाठीचे अर्ज ऑनलाईनद्वारे सादर करणे शक्य होणार आहे.

राज्यातील खड्डे बुजवण्याचे काम जेट पॅचरमार्फत सुरू आहे. दिवसागणिक सुमारे ३५०० चौ. मी. खड्डे बुजवण्याची या यंत्राची क्षमता आहे. सध्या खात्याकडे ७ जेटपॅचर आहेत त्यापैकी ३ दक्षिणेत तर ४ उत्तर गोव्यात आहेत.

राज्यात अनेक ठिकाणी पोर्तुगीजकालीन जलवाहिन्या आहेत. त्या बदलण्यासाठीचे कामही सुरू आहे. काही सुलभ शौचालयांचा गैरवापर केला गेला आहे.

त्याचा वापर न करता त्यामध्ये इतर सामान साठवून ठेवले जात असल्याचे उघडकीस आले आहे. पावसाळ्यापूर्वी राज्यातील खोदलेले रस्ते दुरुस्त करण्यात येतील, अशी माहिती पार्सेकर यांनी दिली.