पणजी: पुण्‍यात एका घराचे रंगकाम करताना बेडरूममधून ४ लाख रुपयांची दोन सोन्याची कडी चोरून फरार झालेल्या संशयिताला गोव्‍यात म्हापसा येथे अटक करण्यात आली. उत्तर गोवा पोलिस अधीक्षक राहुल गुप्ता यांच्या मार्गदर्शनाखाली ही कारवाई करण्‍यात आली. संशयिताकडून चोरीचे दागिनेही हस्तगत करण्‍यात आले.

पोलिसांनी दिलेल्या माहितीनुसार, गेल्‍या २८ जुलै रोजी पुणे शहर पोलिस ठाण्यात प्रमोद शिंदे (कोथरूड-पुणे) याच्याविरोधात गुन्हा नोंदविण्यात आला होता. शिंदेने तक्रारदाराच्या घराचे रंगकाम करताना बेडरूममधून दोन सोन्याची कडी चोरून नेल्याचे तक्रारीत नमूद करण्‍यात आले होते. घटनेनंतर तो फरार झाला होता.

याबाबत पुण्यातून गोव्यात पोलिसांना अलर्ट करण्‍यात आल्‍यानंतर संशयित प्रमोद हा म्हापसा पोलिस ठाण्याच्या हद्दीत लपल्याचे स्‍पष्‍ट झाले. त्‍यानुसार पोलिस अधीक्षक राहुल गुप्ता यांनी म्हापसा पोलिसांना तातडीने कारवाईचे आदेश दिले.

पोलिसांनी जलद कारवाई करत संशयित प्रमोद शिंदे याला अटक केली आणि त्याच्याकडून चोरीचे सोन्याचे दागिने देखील हस्तगत केले. त्यानंतर पुणे शहर पोलिसांना बोलावून संशयिताला त्यांच्या ताब्यात देण्यात आले. पुढील तपास सुरू आहे.

ही कारवाई उत्तर गोवा जिल्हा पोलिसांच्या दक्ष पथकाने यशस्‍वी पार पाडली. म्हापसा पोलिस निरीक्षक निखिल पालेकर, उपनिरीक्षक विशाल मांद्रेकर, कॉन्स्टेबल राजेश कांदोळकर आणि महेंद्र मांद्रेकर यांचा या पथकात समावेश होता.