Ferry Boat: दुचाकी व चारचाकी वाहनांच्या फेरीसेवा शुल्कात वाढ करण्याची अधिसूचना रद्द करण्याची मागणी रिव्‍होल्‍युशनरी गोवन्‍स (आरजी) पक्षाने केली आहे. असे शुल्क लादून सर्वसामान्यांना आणखी महागाईच्‍या खाईत लोटणाऱ्या भाजप सरकारच्या हेतूवर पक्षाचे सांतआंद्रेचे आमदार वीरेश बोरकर यांनी संताप व्‍यक्त केला आहे.

दरम्‍यान, आज शनिवारी ‘आरजी’च्‍या कार्यकर्त्यांनी स्‍थानिक लोकांसह चोडण फेरीधक्क्‍यावर निदर्शन केले. तसेच नदीपरिवहन खात्‍याचे मंत्री सुभाष फळदेसाई यांच्याविरोधात घोषणा दिल्या.

आमदार बोरकर म्हणाले की, फेरीसेवा वाढीव शुल्काच्या निषेधार्थ आम्ही चोडण फेरीधक्क्‍यावर एकत्र येऊन निदर्शने केली. व्यावसायिक वाहनांसाठी १०० रुपये आणि मोठ्या वाहनांसाठी ४०० रुपये अस्वीकार्य आहेत. हे शुल्क रद्द करण्याची आमची मागणी आहे.

मये, चोडण, डिचोली आदी भागातील सर्वसामान्य लोक, विद्यार्थी हे चोडण-रायबंदर फेरीसेवेचा मोठ्या प्रमाणात वापर करतात. वाढीव शुल्‍कामुळे त्‍यांच्‍यावर अतिरिक्त आर्थिक बोजा पडणार आहे. या शुल्काद्वारे महसूल मिळविण्याचा सरकारचा प्रयत्न आहे.

मात्र, भाजप सरकार जनतेला अनेक फायदे मिळवून दिल्याच्या बढाया मारत असताना आता फेरीसेवा शुल्क का आकारत आहे? असा सवाल आमदार बोरकर यांनी उपस्‍थित केला.

• ५० हजारांहून अधिक लोकांना बसणार फटका

• ‘आरजी’चे सदस्य अजय खोलकर म्हणाले की, नदीपरिवहन विभागाकडे आधीच

• ५.५ कोटींचा अतिरिक्त निधी आहे. मग शुल्क आकारण्याची गरज काय?. सरकारने ताबडतोब अधिसूचना रद्द करावी.

• चोडण येथील आरजीचे नेते करण वळवईकर म्हणाले की, फेरी सेवा वापरण्यासाठी वाहनांच्या शुल्कात वाढ केल्यानंतर मये, डिचोली, दिवाडी, साखळी आदी भागातील

• ५० हजारांहून अधिक लोकांना फटका बसणार आहे.