पणजी: जुने गोवे येथील चर्च ही जागतिक वारसा स्थळात येते. त्यामुळे तिच्या तीनशे मीटरच्या परिघात कोणत्याही प्रकारची दोन-तीन मजली इमारत उभारता येत नाही असे असताना त्या ठिकाणी पोलिस स्थानकांची मोठी इमारत सरकार उभारू इच्छिते.

परंतु त्याला आमचा विरोध असून पोलिस स्थानकाच्या नूतनीकरणाला मात्र आमचा विरोध नसल्याचे जुने गोवा येथील स्थानिक जॅकलीन फर्नांडिस यांनी सांगितले. त्या आझाद मैदान येथे आयोजित पत्रकार परिषदेत बोलत होत्या.

यावेळी इतर स्थानिक ग्रामस्थ देखील उपस्थित होते. दरम्यान फर्नांडिस म्हणाल्या, हे पोलिस स्थानक कुंभारजुवे आणि सांताक्रुज अशा दोन मतदारसंघासाठी आहे. जर मोठे पोलिस स्थानक उभारायचे असेल तर त्यांनी दुसरीकडे उभारावे. वारसा स्थळाच्या ठिकाणी नको कारण येथे जर एखादी मोठी इमारत आली तर अनेक इमारती येत राहणार. आम्हाला जुने गोवे येथे ‘मास्टरप्लॅन’ हवा असल्याचे त्यांनी सांगितले.

आमदारांची भेट होईना!

कुभारजुवे मतदारसंघाचे आमदार राजेश फळदेसाई यांनी येथे पोलिस स्थानकाची मोठी इमारत उभारणार असल्याचे म्हटले आहे. परंतु आमचा त्याला विरोध आहे. यासंबंधी आम्ही त्यांना भेटण्याचा अनेकदा प्रयत्न केला, परंतु स्थानिक आमदार यासाठी वेळच देत नसल्याचे विन्सन डिसिल्वा यांनी सांगितले.