Religious Tradition जांबावलीच्या प्रसिद्ध शिशिरोत्सवाला बुधवारपासून कोंबवा़डा येथील कै. पुरुषोत्तम केणी यांच्या निवासस्थानी पुजलेल्या नारळाने सुरवात झाली. गुरुवारी (ता. ९) हा नारळ वाजत गाजत मडगावहून जांबावलीला नेऊन त्याची विधीवत स्थापना करण्यात आली.

संध्याकाळी 6.30 वाजता केणी यांच्या घराकडून मिरवणुकीला सुरवात झाली. यावेळी मठग्रामस्थ मोठ्या संख्येने उपस्थित होते. जुन्या न्यायालयीन इमारतीला वळसा घालून ही मिरवणूक श्री दामोदर सालपर्यंत आली व तिथे युवक-युवतिंनी बॅंड वादनाच्या तालात काही काळ नृत्य केले. नंतर मिरवणूक नगरपालिका इमारतीपर्यंत आली व तेथून थेट जाबांवलीला रवाना झाली.

मठग्रामस्थ जांबावलीच्या दिशेने

आजपासून पुढील सात दिवस जाबांवलीत नाटके, नृत्य व संगीताचे कार्यक्रम होतील. दररोज दुपारी व रात्री महाप्रसादाचे आयोजन केले जाईल. त्यामुळे मठग्रामस्थांचे पाय दररोज जांबावलीच्या दिशेने लागलेले असतील. मंगळवारी (ता.14) दुपारी 3.30 वाजता प्रसिद्ध गुलालोत्सव साजरा होणार आहे. त्यात गोव्यातील कानाकोपऱ्यातून हजारो भक्त व भाविक सहभागी होणार आहेत.