वास्को: साकवाळ-सावळफोंड गावात होत असलेल्या भूतानी इन्फ्रा प्रकल्पाच्या विरोधात बेमुदत उपोषणाला बसलेले माजी सरपंच तथा ज्येष्ठ नागरिक प्रेमानंद पुरुषोत्तम नाईक यांनी आपले उपोषण दहाव्या दिवशी मागे घेतले. मात्र, सांकवाळ पंचायतीसमोर प्रेमानंद नाईक यांच्या समर्थनार्थ साखळी उपोषण सुरूच राहणार असल्याचे आंदोलकांनी सांगितले.

प्रेमानंद नाईक यांनी सांकवाळ शिंदोळी चर्चचे फादर कॅनथ तेलिस यांच्या हातून सरबत घेऊन उपोषण मागे घेतले. यावेळी त्याच्या समवेत आमदार क्रुज सिल्वा, काँग्रेसचे गिरीश चोडणकर, प्रतिमा कुतिन्हो, प्रा. रामराव वाघ, दत्तप्रसाद नाईक, रामा काणकोणकर, शंकर पोळजी , पंच तुळसीदास नाईक, मॉरविल कार्व्हालो, ओलेंसियो सिमॉईश , तारा केरकर व इतर आंदोलक मोठ्या संख्येने उपस्थित होते.

प्रमेश कंट्रक्सनच्या ‘भूतानी इन्फ्रा प्रकल्पा’ ला सांकवाळ पंचायतीने दिलेले परवाने रद्द करण्यासाठी माजी सरपंच प्रेमानंद नाईक उपोषण करत होते. यावेळी प्रेमानंद यांना कुठ्ठाळीचे आमदार आंतोन वाझ, दक्षिण गोवा खासदार कॅ. विरियातो फर्नांडिस यांनी पाठिंबा देऊन आंदोलन मागे घेण्याची विनंती केली होती.परंतु जोवर सांकवाळ व राज्य सरकार भूतानी प्रकल्पाला दिलेले परवाने रद्द करत नाही. तोपर्यंत माझे उपोषण सुरूच राहणार असल्याचे प्रेमानंद नाईक यांनी सांगितले.

दरम्यान, मंगळवार, (ता.२९) रात्री खासदार कॅ. विरियातो फर्नांडिस, पंच मॉरविल कार्व्हालो यांनी प्रेमानंद नाईक यांना उपोषण मागे घेण्यासाठी विनंती करण्यासाठी आले होते. परंतु प्रेमानंद झोपले होते, त्यामुळे खासदार फर्नांडिसनी त्यांना जागे करणे टाळले. दिवाळी मोठा सण असल्याने आम्ही त्यांना उपोषण मागे घेण्याची विनंती करण्यासाठी आले होते, असे सांगितले.

पतीची बदनामी करणाऱ्यांना कोठडीत पाठवणार!

प्रेमानंद नाईक यांच्या पत्नी उज्वला नाईक यांनी सर्व प्रथम सर्वांचे आभार मानून माझ्या पतीची बदनामी करणाऱ्या तिघांना कोठडीत पाठवणार, असल्याचे जाहीरपणे सांगितले. आमचे उपोषण या पुढेही ‘भूतानी’ च्या विरोधात सुरूच राहणार आहे. मला पाठिंबा देणाऱ्या सर्वांचे मी आभार मानतो, असे आंदोलनाला बसलेले प्रेमानंद नाईक यांनी सांगितले. गोवा वाचविण्यासाठी सर्वांनी एकत्रीत राहून लढा देणे आवश्यक असल्याचे नाईक यांनी आवाहन केले. नंतर सांकवाळ पंचायती समोर सुकूर मिनेझीस , पिदोल परेरा, गिलरॉप कोस्टा यांनी साखळी उपोषण सुरू केले.