फोंडा: आयआयटी हे उच्च शिक्षणाचे केंद्र असून ते गोव्यात व्हायलाच हवे; पण त्यासाठी चुकीची जागा निवडू नका. ज्या लोकांची रोजीरोटी चालते, ती जमीन आयआयटीसाठी देऊन या लोकांच्या पोटावर पाय देऊ नका, असे आवाहन नव्याने स्थापन करण्यात आलेल्या ‘उटा’ संघटनेचे प्रतिनिधी तथा माजी मंत्री प्रकाश वेळीप यांनी केले.

‘उटा’ संघटनेचे अध्यक्ष विश्‍वास गावडे तसेच इतर पदाधिकाऱ्यांनी प्रकाश वेळीप यांच्यासह रविवारी (ता.२१) कोडार गावाला भेट देऊन तेथील जमिनीची पाहणी केली व स्थानिकांशी चर्चा केली.यावेळी विश्‍वास गावडे म्हणाले की, ‘उटा’ संघटनेचा पूर्ण पाठिंबा कोडारवासीयांना आहे.

आयआयटी प्रकल्प आणताना सरकारने साऱ्या गोष्टींची पडताळणी करून पाहायला हवी. आदिवासी समाजाच्या हक्काआड येण्याचा प्रकार सरकारने करू नये. ‘उटा’ संघटनेचा पूर्ण पाठिंबा कोडार ग्रामस्थांना आहे. इतरांनीही आपले विचार व्यक्त करताना कोडारवासीयांना पूर्ण पाठिंबा जाहीर केला.

लोकांच्या जीवनाशी खेळू नये

प्रकाश वेळीप म्हणाले की, आदिवासी समाजावर झालेल्या अन्यायाविरुद्ध आम्ही प्रत्येकवेळी आवाज उठवला आहे. त्यामुळे सरकारने आयआयटी प्रकल्प कोडारसारख्या निसर्गसंपन्न भागात आणून येथील लोकांच्या जीवनाशी खेळू नये. आयआयटी प्रकल्प ही गरज आहे; पण त्यासाठी मुख्यमंत्र्यांनी योग्य जागा निवडावी आणि हा प्रकल्प गोव्यात जरूर आणावा.