कळंगुट: दिल्लीतील युवकाचा गोव्यात खून झाल्याचे उघड झाले आहे. कळंगुट समुद्रकिनारी शनिवारी (दि. १० ऑगस्ट) आढलेल्या युवकाचा खून झाल्याची माहिती शवविच्छेदन अहवालातून स्पष्ट झाले आहे. कळंगुट पोलिसांनी याप्रकरणी खूनाचा गुन्हा नोंद केला असून, तिघांना ताब्यात घेतले आहे.

उपलब्ध माहितीनुसार, बागा-कळंगुट समुद्रकिनारी शनिवारी (दि. १० ऑगस्ट) एका युवकाचा मृतदेह आढळला होता. कळंगुट पोलिसांनी घटनास्थळी दाखल होत पंचनामा केला असता मृतदेहावर जखमा आढळून आल्या होत्या. युवकासोबत हिंसक घटना घडल्याचा प्राथमिक अंदाज पोलिसांनी वर्तवला होता.

दरम्यान, मृतदेह शवविच्छेदनासाठी पाठवण्यात आला. शवविच्छेदन अहवालातून धक्कादायक माहिती समोर आली असून, युवकाचा खून झाल्याचे स्पष्ट झाले आहे. युवकाचा सुरी हल्ला करुन खून केल्याचे अहवालात म्हटले आहे.

मृत युवक दिल्लीचा रहिवासी असून, त्याच्याबाबत अद्याप माहिती समोर आलेली नाही. युवक कोणासोबत, का आणि केव्हा गोव्यात आला होता? कोणत्या कारणावरुन त्याचा खून करण्यात आला? कोणी त्याचा खून केला? याबाबत पोलिस तपास करत आहेत.

प्राथमिक संशयावरुन चौकशीसाठी पोलिसांनी तिघांना ताब्यात घेतले असून, अधिक तपास सुरु आहे.