Portuguese to English Translation Archives Dept Goa: गोव्यात सुमारे 450 वर्षाहून अधिककाळ असलेल्या पोर्तुगीज राजवटीमुळे येथील अनेक महत्वाचे आणि ऐतिहासिक दस्तऐवज पोर्तुगीज भाषेत आहेत. यासाठी वारंवार भाषांतराची गरज भासते, हीच गरज लक्षात घेऊन राज्यातील पुराभिलेख खात्याच्या वतीने पोर्तुगीज टू इंग्रजी ऑनलाईन सेवेचा शुभारंभ करण्यात आला आहे.

पुराभिलेख खात्याचे मंत्री सुभाष फळदेसाई यांनी आज (मंगळवारी, दि.26) ऑनलाईन भाषांतर सेवेचे अनावरण केले. पर्वरी येथील कार्यालयात हा कार्यक्रम पार पडला.

फळदेसाई यांनी ऑनलाइन पोर्तुगीज भाषांतर सेवा यासह डॉ. पांडुरंग शेणवी पिसुर्लेकर रिसर्च फेलोशिप योजना आणि मुख्यमंत्री पुराभिलेख प्रकाशन योजना (अभिलेख संशोधन आणि अनुवादाशी संबंधित प्रकाशनांसाठी विशेष सहाय्य) यांची घोषणा केली.

यावेळी राज्यातील विद्याप्रबोधनी महाविद्यालय, पर्वरी, सोहिरोबानाथ अंबिये सरकारी महाविद्यालय पेडणे आणि पीईएस रवी नाईक महाविद्यालय फार्मागुढी, फोंडा या तीन महाविद्यालयांसोबत शैक्षणिक संशोधनासाठी सामंजस्य करार करण्यात आला.

पुराभिलेख विभागातील विविध दस्तऐवज पोर्तुगीज भाषेत आहेत, अनेकांना त्याचे भाषांतर करताना अडचणी येतात. त्यामुळे नागरिकांना डिजिटल स्वरुपात पोर्तुगीजमधून इंग्रजीत भाषांतराची सुविधा उपलब्ध करुन देण्यात आली आहे.

पोर्तुगीज भाषेतील कागदपत्रे ऑनलाईन अपलोड केल्यानंतर त्याचे इंग्रजी भाषांतर पाहायला मिळणार आहे. विशेष बाब म्हणजे संबधिताला ही सर्व प्रक्रिया देखील ट्रॅक करता येणार आहे.