POP Ganesh Idols: प्रदूषण रोखण्यासाठी राज्यात प्लास्टर ऑफ पॅरिसच्या मूर्तींवर बंदी घालण्यात येऊन सुद्धा पीओपीच्या मूर्तींची विक्री केली जात होतीच. याचा परिणाम दिसून आला घरगुती गणेश विसर्जनानंतर.

पीओपीच्या मूर्तींचे विघटन होत नसल्याने त्या तशाच तरंगत राहतात आणि आपल्या मनमोहक बाप्पाचे विद्रूप चित्र आपल्याला पहावे लागते. गोव्यातील समुद्रकिनाऱ्यांवर सध्या हीच परिस्थिती पाहायला मिळत आहे.

कोलवा किनाऱ्यावर दीड दिवसाच्या आणि पाच दिवसाच्या घरगुती बाप्पाचे विसर्जन केल्यानंतर प्लास्टर ऑफ पॅरिसच्या मूर्ती किनारपट्टीवर वाहून आल्या आहेत. यामुळे पुन्हा एकदा राज्यातील पीओपीच्या मूर्ती विक्री आणि खरेदीचा मुद्दा चर्चेचा विषय बनला आहे.

सध्या गणपती सुट्टीनिमित्त राज्यात पर्यटकांची आणि सणाला आलेल्यांची गर्दी वाढली आहे. त्यातच किनाऱ्यावर गणेशमूर्तींचे भग्नावशेष दिसत असल्याने अनेकांच्या धार्मिक भावना दुखावत आहेत.

सरकारने वारंवार सांगूनही नागरिक पीओपीच्या मूर्ती खरेदी करतात, हा चिंतेचा विषय बनला आहे. याबाबत कोलवाचे पंच मिनिनो फर्नांडिस म्हणाले की, सणानंतर मूर्तीचे असे रूप पाहायला मिळणे अतिशय वाईट आहे. यामुळे भक्तांच्या भावना दुखावू शकतात. त्यामुळे, किनाऱ्यावर वाहून आलेल्या मूर्ती पुन्हा खोल समुद्रात सोडणे गरजेचे असून लवकरच ते केले जाईल.