पणजी: गोव्यात गाजत असलेल्या 'कॅश फॉर जॉब' घोटाळ्याप्रकरणी मुख्य आरोपी पूजा नाईक हिने सोशल मीडियावर व्हिडिओद्वारे केलेल्या स्फोटक आरोपांची चौकशी आता गुन्हे शाखेकडून कसून सुरू आहे. नाईकने दोन सरकारी अधिकाऱ्यांनी २०१९ ते २०२२ दरम्यान नोकरी मिळवून देण्यासाठी १७.६८ कोटी रुपये घेतल्याचा दावा केला आहे.
पूजा नाईकवर गोव्यात आधीच ५ गुन्हे दाखल आहेत आणि ती २१ नोव्हेंबर २०२४ रोजी जामिनावर बाहेर आली आहे. यापूर्वीच्या नोंदींमध्ये कोणत्याही सरकारी कर्मचाऱ्याच्या सहभागाचा उल्लेख नव्हता. मात्र, ९ नोव्हेंबर २०२५ रोजी नाईकचा व्हिडिओ व्हायरल झाल्यानंतर, दोन सरकारी अधिकाऱ्यांच्या कथित सहभागाबद्दलच्या आरोपांची चौकशी करण्यासाठी भारतीय न्याय संहिता कलम १७३(३) अंतर्गत गुन्हे शाखेने नवीन तपास सुरू केला आहे.
गुन्हे शाखेने पूजा नाईकला आतापर्यंत दोन वेळा समन्स बजावले असून, तिचे सविस्तर जबाब नोंदवले आहेत. नुकतीच तिची सुमारे पाच तास कसून चौकशी करण्यात आली. नोकरीच्या आश्वासनावर शेकडो पीडितांकडून मोठी रक्कम घेतल्याच्या आरोपांची गुन्हे शाखा तपासणी करत आहे.
नाईकने केलेल्या आरोपांची सत्यता पडताळून पाहण्यासाठी गुन्हे शाखा प्रत्येक पैलूची तपासणी करत आहे. सध्या उपलब्ध असलेल्या नोंदींशी नाईकचे काही आरोप प्राथमिकदृष्ट्या जुळत नाहीत, त्यामुळे तिच्या दाव्यांचे बारकाईने परीक्षण करणे आवश्यक आहे.
घोटाळ्याशी संबंधित एका महत्त्वाच्या आरोपावर गुन्हे शाखेने तपास केला आहे. नाईकने असा आरोप केला होता की, PDA कॉलनीतील एका फ्लॅटमध्ये हे पैशांचे व्यवहार होत असत. मात्र, पोलिसांनी फ्लॅट मालकाकडे चौकशी केली असता, त्याने २०१९ पासून केवळ हॉटेल मॅनेजमेंटचे विद्यार्थी त्या फ्लॅटमध्ये राहत असल्याचे रेकॉर्ड्स सादर केले आहेत.
गुन्हे शाखेने स्पष्ट केले आहे की, पूजा नाईकच्या आरोपांना 'सत्य' मानले जाऊ शकत नाही. सध्या नोंदवलेल्या जबाबांचे विश्लेषण सुरू आहे आणि त्यानंतर या प्रकरणात पुढील कारवाईची दिशा ठरवली जाईल.
कॅश-फॉर-जॉब घोटाळ्याच्या तपासादरम्यान आरोपी पूजा नाईक हिने एका मंत्र्याचे नाव घेतले आहे, पण तिने मंत्र्यावर थेट कोणताही आरोप केला नाही. 'कॅश फॉर जॉब' बाबत पूजाने ज्यांची नावे घेतली, त्यांची नावे आम्ही आताच उघड करणार नाही. या प्रकरणी चौकशीसाठी 'डीएनएनएस' अंतर्गत आम्हाला १४ दिवस मिळाले आहेत. त्या काळात तपास पूर्ण होईल. पूजाच्या दाव्यांत तथ्य सापडल्यानंतर संशयित अधिकार्‍यांना चौकशीसाठी बोलवू : राहुल गुप्ता, अधीक्षक, क्राईम ब्रांच
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.