फोंडा: खांडोळा-माशेल येथून चोरीस गेलेला ट्रक संशयित चोरांसह पकडण्यात फोंडा पोलिसांना यश आले. सांत आंद्रे येथील कार्लोस आफोन्स यांनी आपला ट्रक चोरीला गेल्याची तक्रार फोंडा पोलिस स्थानकात केली होती. जीए 01 डब्ल्यू 6671 या क्रमांकाचा ट्रक 17 रोजी खांडोळा येथे ठेवला असता, 19 रोजी तो गायब असल्याचे निदर्शनास आल्यानंतर पोलिसांत तक्रार देण्यात आली. या प्रकरणी पोलिसांनी खांडोळा येथील संशयित सागर दिलीप हळदणकर याला ताब्यात घेतल्यानंतर त्याने ट्रक चोरल्याची कबुली दिली.

हळदणकर याने हा ट्रक कोलवाळ येथील गॅरेजमध्ये ठेवल्याचे तसेच ट्रकचा मूळ क्रमांक बदलून तो जीए 05 बी 3157 असा केल्याचे निदर्शनास आले. पोलिस निरीक्षक विजयकुमार चोडणकर आणि उपअधीक्षक सी. एल. पाटील यांच्या मार्गदर्शनाखाली पोलिस उपनिरीक्षक साजित पिल्ले, हेड कॉन्स्टेबल केदारनाथ जल्मी, कॉन्स्टेबल रमेश झोरे यांनी ही कारवाई केली. पोलिसांनी ट्रक जप्त करून हळदणकर याला ताब्यात घेतले असून पुढील तपास सुरू आहे.