फोंडा : एक वर्षाच्या लहान मुलाला पळवल्याप्रकरणी फोंडा पोलिसांनी कुमटा - कारवार येथील बिलाल महंमद शेख याला ताब्यात घेतले. मूळ धारवाड - कर्नाटक येथील पण सध्या कारापूर - तिस्क येथे राहणाऱ्या रवी सिद्धप्पा सोनटक्की याच्या तक्रारीवरून ही कारवाई करण्यात आली. मुलाला पळवण्याचा हा प्रकार गेल्या मंगळवारी 17 मे रोजी घडला होता.

तक्रारदार रवी सोनटक्की याच्या पत्नीशी संशयित बिलाल शेख याचे सूत जुळल्याने त्याने रवी सोनटक्की याची पत्नी आणि त्यांच्या एका वर्षाच्या मुलासह कुमटा - कारवार येथे पळ काढला होता. बिलाल शेख हा मूळचा कुमटा - कारवार येथील असला तरी सध्या तो मुजावरवाडा - बाणस्तारी येथे राहत होता. रवी सोनटक्की याच्या तक्रारीवरून फोंडा पोलिसांनी बिलाल शेख याचा बाणस्तारी येथे शोध घेण्याचा प्रयत्न केला असता तो कारवारला पळाला असल्याचे समजले.

या प्रकरणी फोंडा पोलिस स्थानकाचे उपनिरीक्षक सूरज काणकोणकर आणि अन्य पोलिसांच्या पथकाने कुमटा येथे जाऊन संशयित बिलाल शेख आणि एका वर्षाच्या मुलाला हुडकून काढून ताब्यात घेतले. फोंडा पोलिस उपअधीक्षक सी. एल. पाटील व निरीक्षक विजयकुमार चोडणकर यांच्या मार्गदर्शनाखाली ही कारवाई करण्यात आली. पोलिस अधिक तपास करीत आहे.