Ponda: भेडशे-तळावली येथील प्राथमिक शाळेच्या आवारात मोबाईल टॉवर उभारण्याच्या कृतीचा पालक आणि शाळा व्यवस्थापनाने निषेध केला आहे. काल (रविवारी) झालेल्या बैठकीत महालक्ष्मी हायस्कूल तसेच पूर्वप्राथमिक व प्राथमिक शाळेच्या संघटनेतर्फे कोणत्याही स्थितीत शाळेजवळ हा मोबाईल टॉवर नकोच, अशी भूमिका घेतली आहे.

भेडशे - तळावली येथील प्राथमिक शाळेच्या जवळ तसेच महालक्ष्मी इंग्लिश हायस्कूलला लागून असलेल्या जमिनीत मोबाईल टॉवर उभारण्याच्या कार्यवाहीला प्रारंभ झाला आहे. हा मोबाईल टॉवर लहान मुलांना घातक ठरू शकतो, त्यामुळे तो येथून हटवून अन्यत्र उभारा, अशी पालकांची मागणी आहे.

चार दिवसांपासून हा विरोधाचा प्रकार सुरू आहे. पण पालकांचा विरोध मोडून काढण्यासाठी फोंड्याचे मामलेदार तसेच पोलिस फौजफाटा आला, त्यामुळे सरकारी यंत्रणेला जबरदस्तीने हा टॉवर उभारायचा आहे, असे स्पष्ट होते, मात्र विद्यार्थ्यांना घातक ठरणारा हा टॉवर शाळेलगत नकोच, असा धोषा पालकांनी लावला. मोबाईल टॉवर उभारण्यासाठी अन्यत्र जागा असल्याने त्या ठिकाणी हा टॉवर उभारा,असे पालकांनी सांगितले.

दरम्यान, शाळा व्यवस्थापनाच्या झालेल्या बैठकीत शाळेजवळ हा टॉवर बांधण्याचे काम त्वरित रोखा आणि इतरत्र हा टॉवर उभारा अशा प्रकारचे एक निवेदन शिक्षणमंत्री, उपजिल्हाधिकारी तसेच इतर सर्व संबंधितांना देण्याचे ठरले.