Mapusa : जमीन विकण्याचे भासवून व्यावसायिक पुरुषोत्तमकुमार अगरवाल (रा. उत्तराखंड) यांना तब्बल १ कोटी रुपयांना गंडा घातल्याप्रकरणी म्हापसा पोलिसांनी शिवोली येथील दाम्पत्याविरोधात गुन्हा दाखल केला आहे. रेगी फर्नांडिस असे संशयिताचे नाव असून या कृत्‍यात त्‍याला तिच्‍या पत्‍नीचीही साथ असल्‍याचे प्रथमदर्शनी स्‍पष्‍ट झाले आहे.

पोलिसांनी दिलेल्‍या माहितीनुसर, सदर फसवणुकीचा प्रकार २४ जानेवारी २०१९ ते १० जुलै २०२३ यादरम्यान घडला. संशयित दाम्पत्याने फिर्यादी अगरवाल यांना बार्देश तालुक्यातील दोन ठिकाणाच्या जमिनी दाखविल्या होत्या. तसेच सदर जमिनी आपल्याच असल्याचे भासवून जमिनीचे मालकीहक्क विकण्याचे प्रयत्न केले आणि गेल्या दि. २४ जानेवारी

२०१९ रोजी जमीन विक्रीचा करार केला.

या करारानुसार संशयितांनी फिर्यादीकडून १ कोटी रुपयांची रक्कम घेतली. मात्र, त्यानंतर जमिनीचा मालकीहक्क देण्यास संशयितांनी टाळाटाळ केली. त्यामुळे फिर्यादीने रक्कम परत करण्याची मागणी केली. त्यानुसार संशयितांनी आपल्या बँक खात्यात पुरेशी रक्कम नसल्याचे माहित असतानाही फिर्यादीला धनादेश दिले. मात्र, खात्यात पैसे नसल्यामुळे सदर चेक बाऊन्स झाले.

गुन्‍हा केला नोंद

संशयितांनी रक्कम परत करण्यास अपयशी ठरल्यामुळे अखेर फिर्यादी अगरवाल यांनी काल सोमवारी १० जुलै रोजी म्हापसा पोलिसांत याप्रकरणी लेखी तक्रार दिली. या तक्रारीच्या आधारे पोलिसांनी भारतीय दंड संहितेच्या कलम ४०६, ४२० व ३४ कलमान्वये फसवणुकीचा गुन्हा संशयित दाम्पत्याविरुद्ध दाखल केला आहे. पुढील तपास सुरू आहे.