फोंडा : उसगावमधील खुरसाकडे येथे अपघातात जखमी झालेल्या तरुणाचा गोमॅको रुग्णालयात उपचारादरम्यान मृत्यू झाला. प्रशांत घाडी (वय २५) असे या तरुणाचे नाव असून तो उसगावमधील एका कंपनीत सुपरव्हायजर म्हणून काम करत होता.

खुरसाकाडे येथे मंगळवारी दुपारी साडे तीनच्या सुमारास अंगावर काटा आणणारा अपघात घडला. प्रशांतच्या दुचाकीने समोरून येणाऱ्या कारला धडक दिली. हा अपघात ऐवढा भीषण होता की धडकेनंतर प्रशांत हवेत उडाला आणि जमिनीवर आपटला. गंभीर जखमी झालेल्या प्रशांतला तातडीने रुग्णालयात दाखल करण्यात आले.

गोमॅकोत त्याच्यावर उपचार सुरू होते. मंगळवारी सकाळी उपचारादरम्यान प्रशांतची प्राणज्योत मालवली. प्रशांत हा फोंड्यावरून उसगावच्या दिशेने जात होता. तर कार उसगाववरून फोंड्याच्या दिशेने येत होती.

या अपघातात प्रशांतच्या मागून दुचाकीवरून येणारा आणखी एक प्रवासी जखमी झाला. सूरज नाईक असे या जखमीचे नाव असून त्याला देखील किरकोळ दुखापत झाल्याचे समजते.

अपघात ज्या ठिकाणी घडला तिथे गेल्या सहा महिन्यातील हा चौथा मोठा अपघात आहे. या अपघातात आत्तापर्यंत एकूण तीन जणांचा मृत्यू झाला आहे. अपघातप्रवण क्षेत्रात उपाययोजना राबवाव्यात अशी मागणी स्थानिक करत आहे.