Sattari News सत्तरी तालुक्याच्या नगरगाव पंचायतीतील उस्ते बंधारा परिसरात पर्यटकांकडून नदी परिसर गलिच्छ करण्याचा प्रकार वाढत चालला आहे.

काही दिवसांपूर्वी उस्ते ग्रामस्थांनी नदीच्या ठिकाणी बंधाऱ्यावर आंघोळीसाठी आलेल्या पर्यटकांना परिसरात कचरा टाकताना चांगलेच धारेवर धरले होते.

पंचायत सरपंच, उपसरपंच व इतर ग्रामस्थांनी मिळून बंधारा परिसराची स्वच्छता केली होती. तसेच दोन दिवस पोलिसांद्वारे याठिकाणी पाळत देखील ठेवण्यात आली होती.

मात्र आता पुन्हा या ठिकाणी पर्यटकांचा धुमाकुळ सुरूच आहे. नदीच्या बंधारा परिसरात दारु पिऊन रिकाम्या बाटल्या, खाद्य पदार्थांचे प्लास्टिक फेकण्यात आल्या असून काही समाजकंटकांनी नदीकाठी बाटल्या फोडून काचेचे तुकडे सर्वत्र फेकले आहेत.

दरम्यान काल नदीकिनारी गेलेल्या एका युवकाच्या पायात काच घुसून त्याला गंभीर दुखापत देखील झाली होती. त्यामुळे पुन्हा उस्ते बंधारा परिसरातील स्वच्छतेचा प्रश्न ऐरणीवर आला असून या ठिकाणी पर्यटकांना थारा देऊ नये अशी मागणी ग्रासम्थांनी पंचायतीकडे केली आहे.