मडगाव: बड्डे मडगाव येथील सराफावर प्राणघातक हल्ला करणाऱ्या हल्लेखोराच्या मागावर सध्या पोलिस असून संशयित गोव्याबाहेर पळून गेला असावा असा पोलिसांचा कयास आहे. पोलिसांनी तपासकामाबाबत अत्यंत गोपनीयता बाळगली आहे. संशयिताचा शोध चालू असल्याची माहिती फातोर्डा पोलिसांनी दिली.

क्राईम ब्रँचनेही या प्रकरणाचा तपास करीत आहे. संशयिताची सीसीटीव्ही कॅमेरात कैद झालेली छबी पोलिसांनी गोव्यातील सर्व पोलिस ठाण्यात व बाहेरील राज्यातील पोलिस ठाण्यातही पाठवून दिली आहे. 

२२ जुलै रोजी सायंकाळी साडेसहाच्या दरम्यान बड्डे येथील सोहन रायकर यांच्या मालकीच्या देवराय इंदिरा ज्वेलर्स या दुकानात हल्ल्याचीही घटना घडली  होती.

एक इसम या दुकानात आला होता. त्याने आपला चेहरा मास्कने झाकला होता, त्याच्या हातात एक बॅगही होती. आपल्या आईचे दागिने असल्याचे सांगून, ते नव्याने करून घ्यायचे आहेत असे तो म्‍हणत होता. संशयिताचे एकूण वागणे संशयास्पद होते. काही कळण्याच्या अगोदर त्याने सोहनवर हातोड्याने वार केला होता. या हल्ल्यात तो किरकोळ दुखापतीवर बचावला होता. संशयिताकडे एक चाकू होता.

तो त्याने तेथेच टाकून नंतर पळ काढला होता. तो अस्खलित कोकणी बोलत असल्याने तो स्थानिक असल्याच्या ठाम निष्कर्षापर्यंत पोलिस पोचले आहेत. पोलिस निरीक्षक नॅथन आल्मेदा यांच्या मार्गदर्शनाखाली उपनिरीक्षक एस. देविदास पुढील तपास करीत आहे.

पोलिसांची दोन पथके

या घटनेला चार दिवस लोटून गेले आहे. तरीही मारेकरी पोलिसांना सापडलेला नाही. तपासासाठी फातोर्डा पोलिसांनी दोन पथके तयार केली आहेत. पोलिस संशयिताचे मोबाईल लोकेशनही पडताळून पाहत आहे. हा हल्ला का झाला हे अजूनही गुलदस्तात आहे.