Mapusa Police News: करासवाडा येथील शिवाजी महाराजांच्या पुतळ्याच्या दुर्दैवी तोडफोडीनंतर म्हापसा शहरातील महत्त्वाच्या शिवस्मारकांची, शिवाजी महाराजांच्या पुतळ्यांच्या ठिकाणी सुरक्षा व्यवस्था तैनात करण्यात आली आहे.

या पुतळ्यांची सुरक्षा आणि जतन सुनिश्चित करण्यासाठी पोलिस अधिकाऱ्यांकडून पावले उचलण्यात आली आहेत. उत्तर गोव्याचे पोलिस अधीक्षक निधिन वाल्सन आणि म्हापसाचे एसडीपीओ जिवबा दळवी यांच्या देखरेखीखाली कडक बंदोबस्त ठेवण्यात आला आहे.

तसेच आसगाव, कानका आणि करासवाडा या भागात 24 तास गस्त घालण्यात येत आहे. ऐतिहासक स्मारकांचे संरक्षण आणि अनुचित घटना टाळण्यासाठी पोलिसांनी ही पावले उचलली आहेत.

करासवाडा-आकय येथे छत्रपती शिवरायांच्या पुतळ्याची अज्ञातांनी विटंबना केली होती. या प्रकरणी दोषींवर गुन्हा दाखल करून योग्य कारवाई करावी अन्यथा आंदोलनाचा इशारा शिवप्रेमींनी दिला होता. या प्रकरणाच्या तपासासाठी विशेष तपास पथक (SIT) स्थापन करण्याच्या सूचना दिल्या आहेत.

शिवप्रेमींनी करासवाडा-आकय येथे छत्रपती शिवरायांच्या पुतळ्याची पुन्हा स्थापना केली. यावेळी आमदार कार्लुस फेरेरा आणि मंत्री सुभाष फळदेसाई यांनी शिवरायांच्या पुतळ्याला जलाभिषेक घातला.