फोंडा: कुंडई - फोंड्यातील महालसा मधुराम सोसायटीच्या इमारत संकुलात अन्नाच्या शोधात येणाऱ्या कुत्र्याच्या तीन लहान पिल्लांना वीष घालून ठार मारण्याची घटना घडली आहे. दोन दिवसांपूर्वी ही घटना घडली असून याप्रकरणी नलिनी नाईक यांनी तक्रार केली असून सुदिन कामत यांनी प्राणी क्रुरता प्रतिबंधक सोसायटीकडे या तक्रारीचा पाठपुरावा केला आहे.

अन्नाच्या शोधात ही कुत्र्याची चार पिल्ले कुंडई येथील एका सोसायटीत येत होती, त्यावेळेला काहीजणांकडून त्याना अन्न देण्यात येत होते, त्यावेळेला या कुत्र्यांना इमारत संकुलात का आणता, असा सवाल करून ठार मारण्याची धमकीही तिघाजणांनी दिली होती. त्याप्रमाणे या तिघांचीही नावे म्हार्दोळ पोलिस स्थानकात देण्यात आली आहे. पण जोपर्यंत मृत पिल्लांचा चिकित्सा अहवाल येत नाही, तोपर्यंत गुन्हा दाखल करता येणार नाही, असे पोलिसांनी (Police) सांगितले.

चारपैकी तीन पिल्ले लगेच मरण पावली तर एका पिल्लाला कुर्टीतील पशुचिकित्सा केंद्रात दाखल करण्यात आले. तेथे या पिल्लावर उपचार करण्यात आले असून त्याचा जीव वाचला आहे. कुंडई येथील संबंधित सोसायटीतील काही लोकांनी या घटनेचा निषेध केला असून कारवाईचा मागणी केली आहे.