काणकोण: लोलये पंचायत क्षेत्रातील विविध अंतर्गत रस्त्यांवरील पुलांची दुरवस्था झाली आहे. यात पणसखंडे येथील श्री व्यंकटेश देवालया जवळचा पूल त्याचप्रमाणे पेडे- लोलये येथे कोकण रेल्वे स्थानकाजवळ असलेल्या रस्त्यावरील पुलाचा समावेश आहे.

लोलये पंचायतक्षेत्रातील या दोन्ही जीर्ण झालेल्या पुलांच्या स्लॅबच्या लोखंडी सळ्या गंजून त्या बाहेर आल्या आहेत. त्यामुळे पुलाला धोका निर्माण झाला आहे. कोणत्याही क्षणी हे दोन्ही पूल कोसळू शकतात, असा पंचायत क्षेत्रातील स्थानिक रहिवाशांचा दावा आहे.पणसखंडे येथील पूल उभारून अनेक वर्षे झाली आहेत. या जीर्ण पुलाच्या उघड्या पडलेल्या लोखंडी सळ्यांवर सिमेंटचा गिलावा देऊन स्लॅब मजबूत करण्याची मागणी सातत्याने करण्यात येत आहे.

पेडे- लोलये येथील रेल्वे स्टेशन जवळ असलेल्या रस्त्यावरील साकवाची हीच परिस्थिती झाली आहे.सार्वजनिक बांधकाम खात्याच्या सहाय्यक अभियंत्यांनी या कमकुवत झालेल्या पुलाची पाहणी केली होती, मात्र, त्या पुलाला मजबुती देण्याचे काम अद्याप सुरू करण्यात आलेले नाही. या पुलाचा संरक्षक कठडा ही कोसळलेला आहे, त्यामुळे वाहने रस्त्याखालच्या सखल भागात कोसळण्याचा धोका आहे.

काणकोण तालुक्यातील रस्त्यांची खड्ड्यांमुळे आधीच दुर्दशा झाली आहे.यासंदर्भात काणकोण काँग्रेसचे नेते जनार्दन भंडारी यांनी आंदोलन केले होते.