Cattle Pound in Pilerne: वाळपईमध्ये पोटात 30 किलो प्लॅस्टिक असल्यामुळे एका गाईचा दुर्दैवी अंत झाल्याची घटना काही दिवसांपूर्वी घडली होती. यानंतर गाई-गुरांना मानवी आधाराची किती गरज आहे ही गोष्ट अधोरेखित झाली. यातच पिळर्ण पंचायतीने एक कौतुकास्पद उपक्रम सुरू केला आहे. पंचायतीतर्फे गावातील आजारी आणि जखमी गुरांवर उपचार करण्यासाठी कॅटल पाउंडची उभारणी करण्यात आली आहे.

याबाबत माहिती देताना पिळर्णचे उपसरपंच अमरनाथ गोवेकर म्हणाले की, अनेक आजारी आणि जखमी गुरे रस्त्यावर दिसतात. त्यामुळेच पंचायतीने या आजारी आणि जखमी गुरांवर उपचार करण्याचा निर्णय घेतला आहे. आमच्या हितचिंतकांकडून जमा झालेल्या सुमारे 10 लाख रुपये खर्चून आम्ही कॅटल पाउंड बांधले आहे.

आम्ही पंचायतीच्या हद्दीतील रस्त्यांवर दिसलेली आजारी आणि जखमी गुरे इथे आणतो आणि त्यांच्यावर या गोठ्यात उपचार करतो. या प्राण्यांवर उपचार करण्यासाठी दोन पशुवैद्यकीय डॉक्टर पंचायतीला मदत करतात.

एकदा हे प्राणी पूर्णपणे बरे झाले की त्यांना सोडले जाते. पंचायतीने नेमलेले केअरटेकर त्यांची काळजी घेतात. भविष्यात, भटकी गुरेही या कॅटल पाऊंडमध्ये ठेवण्याची पंचायतीची योजना असल्याचे गोवेकर यांनी सांगितले. पंचायतीच्या या उपक्रमाचे सर्व स्तरातून कौतुक होत आहे.