पिळर्ण औद्योगिक वसाहतीमधील बर्जर बेकर कोटिंग या पेंट कंपनीस लाग लागल्यानंतर तिसर्‍या दिवशीही अग्निशमन दलाचे इथे काम सुरुच होते. गोदामाच्या जाग्यावरील ढिगारा हटवून तिथे जवानांकडून पाण्याचा मारा केला जात होता. जेणेकरुन ही आग पूर्णपणे विझावी. आज गुरुवारी संध्याकाळपर्यंत हा आग धुमसण्याचा प्रकार बंद होणार असा अंदाज अग्निशमन दलाने वर्तवला आहे.

मंगळवारी 10 जानेवारी रोजी दुपारी या पेंट कंपनीच्या गोदामास शॉर्ट सर्किटमुळे भीषण लाग लागली होती. या आगीच्या नुकसानीची नेमकी अधिकृत हानी समोर आली नसली तरी नुकसानीचा आकडा हा 50 कोटीपर्यंत जाण्याची शक्यता वर्तविली जात आहे. बुधवारी संध्याकाळपासून गोवा अग्निशमन दलाकडून हायड्रॉलिक क्रेनच्या तसेच जेसीबीच्या सहाय्याने हा ढिगारा बाजूला करुन त्याखाली धुमसणारी आग रोखण्याचे काम चालूच होते.

गुरुवारी देखील दलाचे जवान घटनास्थळी ढिगार्‍यावर पाणी-फोमचा मिश्रित फवारा मारत होते. बुधवारी सकाळी 6.30 वा. ही आग अग्निशमन दलाच्या अथक प्रयत्नानंतर पूर्णपणे आटोक्यात आणली होती. मात्र काही ठिकाणी धुमसण्याचा प्रकार सुरुच होता. जो तिसर्‍या दिवशी बर्‍यापैकी नियंत्रणात आला होता. या आगीमुळे गोदामानजीक वाहनतळावर पार्क केलेल्या कंपनीतील कर्मचार्‍यांची जवळपास 60 दुचाक्या भस्मसात झाल्या. तर दोन चारचाकी जळाल्या आहेत.