Goa University Paper Leak

पणजी: भौतिकशास्त्र विभागाच्या प्राध्यापकाने प्रश्नपत्रिकांची चोरी केल्याचे प्रकरण दडपण्याच्या नादात कुलगुरू आणि कुलसचिवांनी परस्परविरोधी माहिती दिली आहे. कुलगुरूंच्या मते, सत्यशोधन समितीचा अहवाल त्यांनी कुलपतींना दिला आहे, तर कुलसचिवांच्या म्हणण्यानुसार तो अहवाल कार्यकारी समितीच्या विचारार्थ सादर केला जाणार आहे.

कुलगुरू प्रा. हरिलाल मेनन यांनी हा अहवाल प्राप्त झाल्याचे मान्य केले आणि तो आपण कुलपती तथा राज्यपाल पी. एस. श्रीधरन पिल्लई यांना सादर केला आहे. त्यांच्याकडून पुढील आदेशाची आपणाला प्रतीक्षा असल्याचे म्हटले आहे.

कुलसचिव प्रा. सुंदर धुरी यांच्या म्हणण्यानुसार, या समितीचा अहवाल प्राप्त झाला आहे. तो विद्यापीठाच्या कार्यकारी समितीसमोर विचारार्थ ठेवला जाणार आहे. यामुळे नेमका अहवाल आहे कोणाकडे, असा प्रश्न पडला आहे. कुलपती आदेश देणार, की कार्यकारी समिती निर्णय घेणार, याविषयीही या दोघांनी संभ्रम निर्माण केला आहे.

गोवा विद्यापीठातील भौतिकशास्त्र विभागातील प्रश्नपत्रिका चोरीप्रकरणी चौकशीच्या अहवालाची पोलिसांनाही प्रतीक्षा आहे. त्या अहवालाच्या आधारे गुन्हा नोंदवता येईल का, याची चाचपणी पोलिसांनी चालवल्‍याची माहिती मिळाली आहे. या प्रकरणाच्या चौकशीसाठी विद्यापीठाने दोन विभागप्रमुखांचा समावेश असलेली सत्यशोधन समिती नेमली होती.

त्या समितीला केवळ ४८ तासांचा अवधी देण्यात आला होता. राज्यपाल पी. एस. श्रीधरन पिल्लई यांनीही तातडीने अहवाल सादर करा, असा आदेश विद्यापीठाला कुलपती या नात्याने दिला होता. त्यानुसार राज्यपालांना अहवाल सादर करण्यात आला आहे. समितीने आज आपला अहवाल कुलगुरू प्रा. हरिलाल मेनन यांना सादर केला.

अहवालात काय?

‘गोमन्तक’ने हा प्रकार उघडकीस आणल्यानंतर सामाजिक कार्यकर्त्यांनी पोलिसांत तक्रार दिली आहे. एका विद्यार्थिनीला मदत करण्यासाठी हा प्रकार केल्याचा आरोप त्या तक्रारीत केला आहे. संबंधित प्राध्यापकाला नंतर विद्यापीठाने निलंबितही केले आहे. हे प्रकरण दडपण्याचा प्रयत्न विविध पातळीवर होत असल्याने या अहवालात दडलेय काय, याविषयी सर्वांनाच उत्सुकता आहे.