पणजी: भारतीय जनता पार्टीला कॉंग्रेस मुक्त भारत पाहिजे असला तरी याचा अर्थ असा नाही की आम्हाला कॉंग्रेस पक्षाचे अस्तित्व संपवायचे आहे, असे मत केंद्रीय पेट्रोलियम मंत्री हरदीपसिंग पुरी यांनी मांडले. पुरी शुक्रवारी गोवाफेस्ट 2022 मध्ये बोलत होते. (Petroleum minister Hardeep Puri speaks at Goa fest)

भारताला सक्षम विरोधी पक्षाची गरज आहे. या विरोधी पक्षाचे अथवा पक्षांच्या गटाचे नेतृत्व कोण करणार हा देखील मोठा प्रश्न आहे. राहुल गांधी, ममता बॅनर्जी आणि अरविंद केजरीवाल या पदासाठी इच्छुक आहेत, असे पुरी म्हणाले.

पुरी पुढे म्हणाले, आगामी लोकसभा निवडणुकीत मतदार भाजपलाच पसंती देतील याची मला खात्री आहे. आम्हाला कॉंग्रेस पार्टी संपवायची नाही. देशाला सक्षम विरोधी पक्षाची गरज आहे. मागील काही महिन्यात झालेल्या विविध विधानसभा निवडणुकीत भाजपला घवघवीत यश मिळाले आहे. दरम्यान, पुरी यांनी आम आदमी पार्टीचा राजकीय स्टार्टअप असा उल्लेख केला.