Goa: रस्त्यांवरील खड्डे व स्थितीबाबत माहिती देण्यासाठी सार्वजनिक बांधकाम खात्याने पीडब्ल्यूडी ॲप सुरू करताच तासाभरात 15 ठिकाणांहून सुमारे 260 लोकांनी रस्त्यांची छायाचित्रे पाठविली, अशी माहिती सार्वजनिक बांधकाममंत्री नीलेश काब्राल यांनी दिली.

लोकांना रस्त्यांवरील खड्डे व रस्त्यांची स्थिती यासंदर्भातील छायाचित्रे पाठवण्यासाठी सरकारने ॲप सुरू केले आहे. ज्या भागातील रस्त्यांची दुर्दशा झाली आहे, ती वेळेत दुरुस्त न केल्यास त्या भागातील बांधकाम खात्याचे कनिष्ठ अभियंता, साहाय्यक अभियंता, साबांखा अधिकारी तसेच कंत्राटदार यांना जबाबदार धरण्यात येणार आहे.

अशाच प्रकारचे एक ॲप राज्यातील पाणी समस्या, सांडपाणी निचरा व गळती यांची माहिती देण्यासाठी पुढील वर्षात सुरू करण्यात येणार आहे. तक्रारींसाठी लवकरच एक फोन क्रमांकही उपलब्ध करण्यात येणार आहे.

अभियंत्यांना रस्त्यांच्या या तक्रारी सोडवण्यासाठी 24 तास काम करावे लागेल. जर त्यांना शक्य नसेल तर राजीनामा देऊन घरी जावे, असा सक्त इशारा काब्राल यांनी दिला.

मंत्री काब्राल यांच्या हस्ते पाण्याची थकित बिले भरण्यासाठी एकाचवेळी रक्कम जमा करण्याच्या (ओटीएस) ॲपचे उद्‍घाटन करण्यात आले. सुमारे 92.15 कोटींची बिले थकीत आहेत.

या ॲपवर नोंदणी करणाऱ्या ग्राहकांनाच 1 फेब्रुवारी 2023 पासून या योजनेचा मिळणार आहे. त्यानंतर पुन्हा ही योजना लागू करणार नाही. तसेच थकित बिल असलेल्या ग्राहकांचे कनेक्शन बंद केले जाईल, असे काब्राल यांनी सांगितले.