सरकारकडून शिधापत्रिकाधारकांना देण्यात येणारे तांदूळ सडलेले आणि अळ्या निर्माण झालेले असल्यामुळे संतापलेल्या वाडे-कुर्डीतील नागरिकांनी आज सकाळी नागरी पुरवठा अधिकाऱ्यांच्या सांगे येथील कार्यालयात येऊन सडलेले तांदूळ टेबलवर ओतले.

याबाबत लोकांनी स्पष्टीकरण मागितल्यानंतर यापुढे असा प्रकार घडणार नसल्याची ग्वाही अधिकाऱ्यांनी दिली. त्यानंतर नागरिकांनी परत जाण्याचा निर्णय घेतला.

सविस्तर माहितीनुसार, शिधापत्रिकेवर दिलेल्या तांदळात अळ्या निर्माण झाल्या होत्या. तो तांदूळ बदलून देण्यास दुकानदाराने नकार दिल्याने नागरिकांनी थेट सांगे येथील नागरी पुरवठा खात्याचे कार्यालय गाठून सडलेले व अळ्या निर्माण झालेले तांदूळ अधिकाऱ्यांच्या टेबलवर ओतले.

यापूर्वी सडलेले तांदूळ दिल्याच्या तक्रारी येत होत्या; पण त्यात सुधारणा होत नसल्याने अखेर नागरिकांनी खात्याच्या कार्यालयावर धडक देण्याचा निर्णय घेतला. पंचायत सदस्य चंदन उनंदकर आणि जुझेफिना फर्नांडिस यांच्या नेतृत्वाखाली संतप्त नागरिकांनी अधिकाऱ्यांना प्रश्न विचारून केवळ वाडे-कुर्डीतील नागरिकांना सडलेले तांदूळ का देता, असा प्रश्न विचारला.

खराब तांदूळ बदलून देऊ, असे अधिकाऱ्यांनी सांगितले. अनेक ठिकाणी हा प्रकार उघडकीस आल्यामुळे नागरी पुरवठा खात्याच्या कारभाराविषयी संताप व्यक्त करण्यात येत आहे.