आयएएस अधिकाऱ्याचा पीए आणि चालक असल्याचे सांगत एका तारांकित हॉटेलसाठी भाडेपट्टीवर कंत्राट देण्याचे आमिष दाखवून 10.55 लाखांची फसवणूक करणाऱ्या डिचोलीतील समीर धावस्कर आणि दिनकर सावंत यांना पणजी पोलिसांनी आज शिताफीने अटक केली.

संशयित समीर याने काही युवकांना सरकारी नोकरी देण्याची आश्‍वासने देत सुमारे 2 कोटी 12 लाखांनाही गंडा घातल्याचे उघडकीस आले आहे.

समीर आणि दिनकर यांनी उसगाव येथील मुकेश नाईक याला पणजीतील तारांकित हॉटेलसाठी कंत्राटी पद्धतीवर वाहन लावून देतो, असे सांगून त्याच्याकडून 10.55 लाख रुपये घेतले होते.

मात्र, अनेक दिवस वाहनाचे कंत्राट न देताच ते दोघे गायब झाले. या प्रकरणात पोलिस निरीक्षक निखिल पालेकर यांच्या नेतृत्वाखाली उपनिरीक्षक मयूर पणशीकर, हवालदार नितीन गावकर, इर्मिया गुर्रैय्या, आदित्य म्हार्दोळकर व रामा घाडी यांनी महत्त्वाची कामगिरी बजावली.

सावज सापळ्यात

मुकेश याच्या तक्रारीची चौकशी करताना अनेकांनी पणजी पोलिसांत समीरबद्दलही तक्रारी दिल्या. स्वत:ला आयएएस अधिकाऱ्याचा चालक असल्याचे सांगून सरकारी नोकऱ्या देतो, अशी थाप मारत समीरने तब्बल 2.12 कोटी रुपये लुबाडल्याचे पोलिसांना समजले. यानंतर पोलिसांनी शिताफीने सापळा रचून डिचोली परिसरातून दोन्ही संशयितांना ताब्यात घेतले.