मेरी इमॅक्युलेट चर्चची फेस्त फेरी 14 ते 18 डिसेंबर रोजी फेरी भरणार आहे. या फेरीत दुकानासाठी सोमवारी महापालिकेने 380 अर्जांची विक्री केली. या प्रक्रियेतून महापालिकेला यंदा 19 लाख 76 लाखांचा महसूल जमा झाला आहे, अशी माहिती लेखा व कर अधिकारी सिद्धेश नाईक यांनी दिली.

फेरीसाठी परराज्यातील व्यावसायिक मोठ्या प्रमाणात गर्दी करतात. त्याचाच फायदा उठवून गणेशोत्सवाच्या फेरीच्या अर्जांचा जो काळाबाजार झाला, त्यातून पणजी महापालिकेची बदनामी झाली होती. त्यातून महापालिकेने धडा घेत यावेळी नियमावली करीत स्थानिक व्यावसायिकांना प्रथम प्राधान्य देण्यात आले. त्यासाठी स्थानिक ओळखपत्र म्हणून आधारकार्ड दाखविणे बंधनकारक करण्यात आले होते. आज दोनशे रुपये प्रमाणे 380 अर्ज देण्यात आले. त्याशिवाय पाच दिवसांचे पाच हजार रुपये भाडे अशा प्रकारे प्रत्येक व्यावसायिकाकडून 5,200 रुपये आकारण्यात आले. त्यातून महापालिकेच्या तिजोरीत 19 लाख 76 हजार रुपये जमा झाले आहेत, असे नाईक म्हणाले.

नाताळ आणि वर्षाअखेरीचा महिना असल्याने या महिन्यात पर्यटक मोठ्या प्रमाणात गर्दी करतात. त्याचा फायदाही या फेरीवाल्यांना होत असतो. त्यासाठी या फेरीसाठी दुकाने मिळविण्यासाठी विविध तालुक्यातील स्थानिक व्यावसायिक प्रयत्नशील असतात. गणेशोत्सवाच्या फेरीवेळी अर्जांसाठी नगरसेवकांच्या नातेवाईकांनी जो घोळ घातला होता, तो आजही अधिकाऱ्यांना आठवतो.

प्रवेशद्वारावर गर्दी!

अर्ज विक्री होणार असल्याने महापालिका प्रशासनाने पोलिस बंदोबस्त मागविला होता. मोजकेच आणि प्रथम आलेल्यास प्राधान्य, अशा अटीवर अर्ज विक्री झाल्याने थोडाफार गोंधळ उडाला. अर्ज न मिळालेल्यांनी प्रवेशद्वारावर गर्दी केली, परंतु पोलिस त्याठिकाणी असल्याने व्यावसायिकांनी काढता पाय घेतला.