गोव्यातील पंचायत निवडणुका 4 जून रोजी होतील असा अंदाज होता. काही दिवसांपूर्वी स्वत: पंचायत मंत्री माविन गुदिन्हो यांनी या तारखेचा उच्चार केला होता. मात्र अजून पंचायत निवडणुकांच्या तारखा अधिकृतपणे जाहीर झालेल्या नाहीत. त्यामुळे त्या पुढे ढकलण्याची शक्यता असून जास्त करुन जून महिन्याच्या दुसऱ्या आठवड्यात त्या होण्याची शक्यता आहे. (Panchayat elections possible in second week of June Mavin Gudinho)

मडगावात एका कार्यक्रमावेळी मंत्री माविन गुदिन्हो यांना या संदर्भात प्रश्र्न विचारला असता त्यांनी सांगितले की, पंचायतीचे प्रभाग निश्चित करण्याची प्रक्रिया पूर्ण झालेली नाही. तसेच कुठले प्रभाग आरक्षित केले जातील याचा सुद्धा निर्णय झालेला नाही. त्यामुळे पंचायत निवडणुका एका आठवड्याने पुढे ढकलाव्या लागतील, असे त्यानी सांगितले.

या निवडणुका जास्त करुन रविवारी घेतल्या जातात. त्याप्रमाणे अंदाज केला तर त्या 12 जून रोजी घेण्याची शक्यता नाकारता येत नाही. पंचायत निवडणुका पक्षपातळीवर लढवू नये. मात्र यासाठी सर्व गावकऱ्यांचा पाठिंबा व सहकार्य अपेक्षित आहे. सरकारला सुद्धा ग्रामीण भागाचा विकास व्हावा असे वाटते व त्यासाठी सरकार कटीबद्ध आहे. आणि म्हणूनच सर्वांचे सहकार्य अपेक्षित आहे, असेही ते म्हणाले.