राजधानी पणजी आणि पुंडलिकनगर-पर्वरी ते चाररस्ता जंक्शन यादरम्‍यानच्‍या रस्त्यावरची वाहतूक सातत्याने खोळंबण्याचे प्रकार होत आहे. प्रजासत्ताकदिन वीकेंड साजरा करण्‍यासाठी मोठ्या संख्‍येने आलेल्‍या देशी पर्यटकांमुळे काल शनिवारी आणि आज रविवारी या दोन्‍ही ठिकाणी वाहतुकीची प्रचंड कोंडी झाली. त्‍यामुळे लोकांना मन:स्‍ताप सहन करावा लागला.

कर्नाटक, तामिळनाडू, महाराष्ट्र व ओरिसा या राज्यातील अनेक पर्यटक आपली वाहने घेऊन वीकेंड एन्जॉय करण्यासाठी गोव्यात आलेले आहेत. राजधानी पणजीलाही ते आवर्जुन भेट देतात. त्‍यातच काही ठिकाणी या रस्त्याच्‍या रुंदीकरणाचे काम सुरू आहे. दोन महिने झाले तरी हे काम पूर्ण झाले नसल्‍याने वाहनचालकांसाठी हा मोठा डोकेदुखीचा विषय बनला आहे.

सुरवातीस बाजूचा पट्टा मातीचा असला तरी वापरण्याजोगा होता, परंतु आता त्या जागी खडी टाकल्याने त्या पट्ट्यावर वाहने पंक्‍चर होण्याच्या भीतीने चालक रस्त्याच्या मधून वाहने हाकतात. तसेच काही बेशिस्त पर्यटक वाहतुकीचे सर्व नियम धाब्‍यावरल बसवून वाहने हाकतात. परिणामी वाहतूक कोंडीत आणखी भर पडते. वाहतुकीची ही समस्‍या दूर करण्‍यासाठी सरकारने गांभीर्याने पावले उचलणे गरजेचे आहे.