Goa Dengue Cases in August: गोव्यात ऑगस्ट महिन्यात डेंग्युचे 3,119 संशयित रुग्ण आढळले असून त्यापैकी 80 डासांमुळे होणाऱ्या या विषाणूजन्य आजाराची लागण झाल्याचे स्पष्ट झाले आहे.

आरोग्य सेवा संचालनालय (DHS) च्या आकडेवारीनुसार उत्तर गोव्यात डेंग्यूच्या एकूण 70 रुग्णांची नोंद झाली आहे. तर दक्षिण गोव्यात डेंग्युचे 10 रूग्ण आहेत.

या वर्षी, म्हापसा (14), साळीगाव (12) आणि साखळी (11) येथे डेंग्युची सर्वाधिक प्रकरणे आढळून आली आहेत. गेल्या वर्षी ऑगस्टमध्ये 2195 संशयित रुग्ण आढळले होते तर त्यापैकी 95 जणांना डेंग्यू झाला होता.

DHS पणजी येथील विषाणूजन्य रोगांवर नियंत्रण ठेवण्यासाठीच्या नोडल ऑफिसर डॉ. कल्पना महात्मे यांच्या माहितीनुसार संशयित रुग्ण आता बरे झाले आहेत.

जानेवारी ते ऑगस्ट या कालावधीत गेल्या वर्षी 250 च्या तुलनेत यंदा 180 डेंग्यू रुग्णांची नोंद झाली आहे.

ऑगस्टमध्ये पावसाने ब्रेक घेतल्याने बहुतांश ठिकाणी पावसाचे पाणी साचून राहिले. त्यामुळे डासांची उत्पत्ती झाली आहे.

नागरीकांनी डेंग्यूबाबत घाबरून जाण्याची गरज नाही, परंतु त्यांच्या घराभोवती किंवा कामाच्या ठिकाणी पाणी साचणार नाही, याची काळजी घेतली पाहिजे.

लोकांनी फ्लॉवरपॉट्स, अॅक्वेरियमचे पाणी वेळोवेळी बदलावे. एअर कंडिशनरमधून पाणी गोळा करणारे रिसेप्टॅकल्स रिकामे करावेत.

आरोग्य केंद्रांच्या कामगिरीमुळे डेंग्यूचे रुग्ण कमी होत आहेत. आरोग्य केंद्रांनी माहितीची मोहिम राबवली, क्षेत्र तपासणी केली तसेच डेंग्युच्या स्त्रोतांची माहिती घेऊन त्यावर योग्य ती कार्यवाही केली.

स्वच्छता कर्मचारी राज्यभरात विविध ठिकाणी फॉगिंग करत आहेत. डासांची उत्पत्ती रोखण्यासाठी अँटी-लार्व्हा एजंट्सचा वापर करत आहेत.