Goa Crime News: उच्चशिक्षित पीएच.डी. धारक तथा बंगळुरूस्थित आर्टिफिशियल इंटेलिजन्स कंपनीची सीईओ, कोट्यवधींची मालकीण सूचना सेठ हिने विभक्त नवऱ्यावरील रागातून पोटच्या चार वर्षीय मुलाला निर्दयीपणे ठार मारल्याचा माणुसकीला काळीमा फासणारा प्रकार उघडकीस आला.

एवढ्यावरच ती वैरिण माता थांबली नाही. बालकाचा मृतदेह सूटकेसमधून ती घेऊन जात होती. मात्र, या महिलेला पोलिसांनी कर्नाटकमध्ये शिताफीने पकडले. सूचनाला मंगळवारी कळंगुट पोलिसांनी न्यायालयात हजर केले असता, तिला 6 दिवसांची पोलिस कोठडी सुनावली. सूचनाने प्रथमदर्शनी अतिशय थंड डोक्याने विचार करून ही हत्या केल्याचे दिसते.

तिने सिकेरीमधील गेस्ट हाऊसमध्ये आत्महत्या करण्याचा प्रयत्न केला, असे पोलिस सूत्रांनी सांगितले. मात्र, तिने खरोखरच आत्महत्येचा प्रयत्न केला की, या प्रकरणातून इतरांचे लक्ष विचलित करण्यासाठी तिने डाव रचला, हे पोलिस तपासात पुढे उघड होईल.

गळा दाबल्याने मुलाचा मृत्यू

त्या मुलाची डॉ. कुमार यांनी चित्रदुर्ग येथे शवचिकित्सा केली. त्यांच्या म्हणण्यानुसार, मुलाचा गळा दाबून मृत्यू झाला आहे. तिने मुलाला मारताना उशी वापरली असावी. मुलाच्या मृत्यूला ३६ तासांपेक्षा जास्त काळ झाला असून रक्ताची कमतरता किंवा दुखापतीच्या खुणा नाहीत.

संघर्षाचीही चिन्हे नाहीत. जेव्हा तुमचा गळा दाबला जातो, तेव्हा दबावामुळे शिरा बाहेर पडत नाहीत. मग ती छातीची नस असो किंवा चेहऱ्यावरील शिरा. शिरा फुगल्या, ही सर्व गळा दाबण्याची चिन्हे आहेत. त्यामुळे शरीराला इजा होत नाही.