Crime News: चिंबल येथील 17 वर्षीय मुरगन गौंडर याच्या खूनप्रकरणी चौघांविरुद्ध आरोप निश्‍चितीचा आदेश सत्र न्यायालयाने दिला आहे. चाकूने भोसकून मयताचा खून केला त्यावेळी सर्व संशयित तेथे होते तसेच त्या सर्वानीच त्याच्यावर हल्ला केला होता. त्यामुळे या सर्व संशयितांविरुद्ध आरोप निश्‍चितीसाठीचे पुरेसे पुरावे आहेत असे निरीक्षण न्यायालयाने केले.

जुने गोवे पोलिसांनी मुरगन गौंडर याच्या खूनप्रकरणी प्रतिक्षा ऊर्फ निलिमा गौंडर, लिंगनाथ पालयेकर, परशुराम गौंडर व हेमंत पालकर याना अटक केली होती. सर्वांविरुद्ध भादंसंच्या कलम ३२४, ५०४, ५०६, ३०२ व २०१ खाली गुन्हा दाखल केला होता. मुरगन गौंडर याला चाकूने भोसकून खून केल्यानंतर वापरण्यात आलेला चाकू गायब केला होता.

पोलिसांनी याप्रकरणी तपास करून चौघांविरुद्ध न्यायालयात आरोपपत्र दाखल केले होता. आरोप निश्‍चितीच्या सुनावणीवेळी संशयितांच्या वकिलांनी युक्तिवाद करताना मयताचा खून चाकूने एकदा वार केल्यानंतर झाला होता. लिंगनाथ पालयेकर याने चाकूने भोसकले होते त्यामुळे इतर संशयितांचा या खुनाशी काहीच संबंध नसल्याचा दावा केला होता. तो न्यायालयाने फेटाळून लावून सर्व संशयित या गुन्ह्याला जबाबदार असल्याचे निरीक्षण केले.