पणजी: गोव्यात नव्याने तीन रेल्वे स्थानक होणार आहेत. कोकण रेल्वेच्या मार्गावर होणाऱ्या या नव्या स्थानकांमुळे प्रवाशांना फायदा होणार असला तरी आता या स्थानकांना राज्यातून विरोध होत आहे. हिवाळी अधिवेशनात विरोधी बाकावरील आमदारांनी नव्या स्थानकांना विरोध दर्शवला. स्थानिकांचा विरोध होत असताना नवी स्थानके कशासाठी असा सवाल आमदारांनी उपस्थित केला.

कोकण रेल्वे मार्गावरील प्रवाशांना चांगली सेवा देण्यासाठी गोव्यात नेवरा, सारझोरा आणि मये या ठिकाणी तीन नवीन रेल्वे स्थानक जाहीर करण्यात आली आहेत. नव्या रेल्वे स्थानकांना सध्या सुरु असलेल्या हिवाळी अधिवेशनात विरोधी बाकावरील आमदारांनी विरोध दर्शवला.

आपचे आमदार क्रुझ सिल्वा यांनी याबाबत लक्षवेधी मांडली. स्थानिकांचा विरोध होत असताना नव्याने स्थानक उभारण्याचा घाट का घातला जात आहे, असा सवाल सिल्वा यांनी उपस्थित केला.

तसेच, जे हवं ते देण्याऐवजी नको ते का माथी मारले जात आहे, असेही सिल्वा म्हणाले. शिवाय कोळसा वाहतूक आणि इतर प्रदूषण संबधित वस्तूंच्या वाहतुकीची शंका त्यांनी उपस्थित केली. सिल्वा यांच्या लक्षवेधीवर आमदार वीरेश बोरकर, वेंझी व्हिएगस यांनी देखील मत मांडले.

वीरेश बोरकर यांनी नेवरा येथील रेल्वे स्थानकाला ३० वर्षापूर्वी देखील विरोध झाला होता. खाजन शेतकऱ्यांच्या विरोधानंतर हे रेल्वे स्थानक करमळी येथे हलविण्यात आले होते. दरम्यान, पुन्हा एकदा येथे येथे स्थानक का आणले जातंय, असे बोरकर म्हणाले.

आपचे आमदार वेँझी व्हिएगस यांनी देखील नव्या स्थानकांना विरोध दर्शवला. नव्याने होणाऱ्या तीन रेल्वे स्थानकाला स्थानिक नागरिक आणि आमदार विरोध करत आहेत, असे राज्य सरकारने केंद्राला कळवावे अशी विनंती व्हिएगस यांनी यावेळी केली. मुख्यमंत्री सावंत यांनी यावर उत्तर देताना रेल्वेचा विषय केंद्राच्या अखत्यारित येतो असे सांगत विषय गुंडाळण्याचा प्रयत्न केला.

दरम्यान, यावेळी त्यांनी कोकण रेल्वेच्या मार्गे गोव्यात कोळसा वाहतूक होणार नाही हे स्पष्ट केले. शिवाय ज्यांना त्यांच्या मतदारसंघात रेल्वे स्थानक नको आहेत त्यांनी लेखी द्यावे, असेही सावंत म्हणाले.

नव्या स्थानकांना विरोध व्हायला लागल्यानंतर वाहतूक मंत्री माविन यांनी आक्षेप घेत काय प्रश्न उपस्थित करतो यावर आमदारांनी विचार करावा, असे म्हटले. यावरुन विरोधी पक्षनेते युरी आलेमाव आक्रमक झाल्याचे पाहायला मिळाले.