केपे: आपल्या कार्यकाळात कुडचडेचा विकास करण्यासाठी मी प्रयत्न केले. पण काही विरोधक काही विकासकामांबाबत कोणताही अभ्यास न करता लोकांची दिशाभूल करीत आहे अशी टीका सार्वजनिक बांधकाम खात्याचे मंत्री निलेश काब्राल यांनी केली. ते शेल्डे व असोल्डा येथील तळ्यांच्या सुशोभिकरणाच्या उद्‍घाटन कार्यक्रमात बोलत होते. (Nilesh Cabral News)

यावेळी जिल्हा पंचायत सदस्य सिद्धार्थ गावस देसाई, सरपंच कायतान लिमा, पंच सदस्य प्रमोद देसाई, विवेक शेटकर, नगराध्यक्ष विश्वास सावंत देसाई व इतर मान्यवर हजर होते. ‘२५ लाख खर्चून जिल्हा पंचायत निधीतून दोन्ही तळींचे सुशोभीकरण करण्यात आले आहे. कुडचडे मतदारसंघात अनेक विकास कामे मार्गी लावली आहेत. तर काही पूर्णत्वास गेली आहे. काकोडा येथील अत्याधुनिक कचरा प्रक्रिया प्रकल्पाचे काम अंतिम टप्यात असून त्याचे ३० मे रोजी उद्‍घाटन होऊ शकते. तसेच मल निस्सारण प्रक्रिया प्रकल्प, भूमिगत वीज वाहिन्या घालण्याचे काम प्रगतीपथावर आहे’ असे काब्राल यांनी सांगितले. तर काब्राल यांच्या सहकार्यामुळे कुडचडे पालिका क्षेत्राबरोबर पंचायत क्षेत्रातील भागांचाही विकास होत असल्याचे सिद्धार्थ गावस देसाई यांनी सांगितले.