म्हापसा: म्हापशात भाजपमध्ये सध्या असलेला अंतर्गत वाद विकोपाला गेला आहे. पालिका निवडणुकीत भाजप गटातील ज्येष्ठ नगरसेवकांना निवडणूक लढवण्यापासून परावृत्त करण्यात आले. त्यासाठीच्या प्रभाग आरक्षण करण्यात आमदार डिसोझा यांचीच महत्त्वाची भूमिका असल्याची भावना झाल्याने ती मंडळी भाजपवर (BJP) नाराज आहेत,त्या नाराज लोकांचे सुधीर कांदोळकर यांनाच पाठबळ मिळेल, असा दावा म्हापसा गट काँग्रेसचे अध्यक्ष अँड.शशांक नार्वेकर (Shashank Narvekar) यांनी केला. (Goa Assembly Election 2022 News Updates)

सुधीर कांदोळकर यांनी सुरू केलेल्या घरोघरी प्रचाराला मतदारांकडून उत्तम प्रतिसाद लाभत आहे. कुचेली, करासवाडा, धुळेर, गणेशपुरी, दत्तवाडी, अन्साभाट, आंगड, गावसवाडा, खोर्ली, मरड इत्यादी महत्त्वपूर्ण भागांत प्रचाराची पहिली फेरी संपवून दुसऱ्या फेरीसाठी ते सध्या फिरत आहेत, असे नार्वेकर यांनी सांगितले.

यंदाच्‍या निवडणुकीत (Goa Elections 2022) कांदोळकर यांच्यासमवेत वीसपैकी सात नगरसेवक सक्रियपणे प्रचार करीत आहेत. शिवाय बहुसंख्य कार्यकर्ते भाजपमधून दाखल झाले आहेत, असेही नार्वेकर म्हणाले.