Blue Cab service suspended: पेडणे तालुक्यातील टॅक्सी चालकांसाठी खास सुरू करण्यात आलेली 'ब्लू कॅब' प्रीपेड टॅक्सी सेवा मोपा विमानतळावर मंगळवारपासून (दि. १५) अचानक बंद करण्यात आली आहे. विमानतळ प्रशासनाने सुरक्षा मंजुरी न मिळाल्याचे कारण देत ही कारवाई केली असल्याने स्थानिक टॅक्सी चालकांमध्ये नाराजी पसरलीये.

जीएमआर एअरपोर्ट्स लिमिटेडने ब्लू कॅब प्रीपेड टॅक्सी असोसिएशनला पाठवलेल्या पत्रानुसार, परवाना करारातील नियमांनुसार असोसिएशनला गृह मंत्रालय आणि नागरी विमान वाहतूक सुरक्षा ब्युरोची सुरक्षा मंजुरी घेणे आवश्यक होते.

वारंवार याबद्दल माहिती देऊन देखील ही मंजुरी सादर न केल्याने परवाना कराराचे उल्लंघन झाले असल्याचे नमूद करत जीएएलने तातडीने सेवा बंद करण्याचा निर्णय घेतला आहे.

यापूर्वीही जून २०२४ आणि जानेवारी २०२५ मध्ये यासंदर्भात नोटिसा पाठवल्याचा दावा जीएएलने केलाय. ब्लू कॅब प्रीपेड टॅक्सी असोसिएशनने नोटीस मिळाल्याची माहिती देत याप्रकरणी तोडगा काढण्यासाठी चर्चा सुरू असल्याचे सांगितले.

मोपा विमानतळावरील गोवा पर्यटन विकास महामंडळाचा टॅक्सी काउंटर १ एप्रिलपासून बंद होता, जो मांद्रेचे आमदार जीत आरोलकर यांच्या मध्यस्थीनंतर नुकताच पुन्हा सुरू झालाय. मात्र आता ब्लू कॅब सेवा बंद झाल्याने पेडणेतील अनेक टॅक्सी चालकांच्या रोजगारावर पुन्हा एकदा संकट ओढवले आहे.

विमानतळ सुरू झाल्यापासून स्थानिक टॅक्सी चालक स्वतंत्र काउंटरसाठी आंदोलन करत होते आणि अनेक प्रयत्नांनंतर त्यांना ही ब्लू कॅब सेवा मिळाली होती, मात्र आता तीही बंद झाल्याने त्यांच्यात असंतोष पसरलाय. गेल्यावेळीप्रमाणे आमदार आरोलकर पुन्हा मध्यस्थी करणार का, याकडे आता सर्वांचे लक्ष लागून लागले आहे.