काणकोण रवींद्र भवनाचे उद्‍घाटन २७ जुलैला करण्याची जोरदार तयारी सुरू झाली आहे. नुकतीच सभापती रमेश तवडकर यांनी तयारीची पाहणी करून कामाचा आढावा घेतला.रवींद्र प्रकल्पाची पायाभरणी होऊन एक तप पूर्ण झाले आहे. बारा वर्षांपूर्वी रमेश तवडकर व तत्कालीन मुख्यमंत्री दिवंगत मनोहर पर्रीकर यांनी या प्रकल्पाची पायाभरणी केली होती.

सुमारे ६५ कोटींचा हा प्रकल्प कला व संस्कृती खात्याच्या अंतर्गत हा प्रकल्प साधन‌ सुविधा मंडळ पूर्ण करीत आहे. साधन सुविधा महामंडळ कोणताही प्रकल्प पूर्ण झाल्याशिवाय त्या प्रकल्पाचे हस्तांतरण करीत नाही, असा आजपर्यंतचा इतिहास आहे. मंत्री गोविंद गावडे यांनी यंदाची राज्यस्तरीय नाट्य स्पर्धा काणकोण रवींद्र भवनात घेण्याची घोषणा केली होती.

त्याचबरोबर यंदाच्या राज्यस्तरीय रानभाजी महोत्सवाचे आयोजन १७ ऑगस्टला रवींद्र भवनात करण्याचे सभापती रमेश तवडकर यांनी निश्चित केले आहे.या सर्व उपक्रमांसंदर्भात सभापतींनी आज रवींद्र भवनाची पाहणी करून कामाच्या विकासाचा आढावा घेतला.