फोंडा: वरगाव-माशेल येथे राहणाऱ्या आरती देवी या महिलेची ऑनलाईन गुंतवणुकीच्या आमिषाने तब्बल एक लाख रुपयांची फसवणूक झाल्याची घटना उघडकीस आली आहे. या प्रकरणी म्हार्दोळ पोलिसांकडून सखोल तपास सुरू करण्यात आला आहे.

मिळालेल्या माहितीनुसार, आरती देवी यांच्या सोळा वर्षीय मुलाला समाज माध्यमांवर “गुंतवणूक करा आणि दुप्पट पैसे मिळवा” अशी आकर्षक जाहिरात दिसली. त्याने जाहिरातीत दिलेल्या मोबाईल क्रमांकावर संपर्क साधला. संबंधित व्यक्तीने सुरुवातीला तीन हजार रुपये गुंतवण्यास सांगितले.

यानंतर भामट्याने मोठा नफा मिळवण्यासाठी एक लाख रुपये गुंतवण्याचा सल्ला दिला. “२ लाख १५ हजार रुपये परत मिळतील” असे आमिष दाखवत विविध कर, प्रोसेसिंग फी आणि इतर शुल्कांच्या नावाखाली टप्प्याटप्प्याने पैसे भरायला लावले. मात्र, पैसे भरल्यानंतर संबंधित व्यक्तीने संपर्क तोडला.

फसवणूक झाल्याचे लक्षात आल्यानंतर आरती देवी यांनी म्हार्दोळ पोलिसांत तक्रार दाखल केली. पोलिसांनी अज्ञात भामट्याविरुद्ध गुन्हा नोंदवून तपास सुरू केला आहे. नागरिकांनी अशा ऑनलाईन गुंतवणूक योजनांपासून सावध राहावे, असे आवाहन पोलिसांनी केले आहे.