Lok Sabha Election:

लोकसभा निवडणुकीत गोव्याचा समावेश मतदानासाठी तिसऱ्या टप्प्यात करण्यात आल्याने आम्हाला प्रचारासाठी आणखीन वेळ मिळणार आहे. गोव्यात पहिल्याच टप्प्यात मतदान होईल असे गृहीत धरून आम्ही प्रचाराची एक फेरी आधीच पूर्ण केली होती, असे भाजपचे प्रदेशाध्यक्ष सदानंद शेट तानावडे यांनी आज सांगितले.

ते म्हणाले, उमेदवार जाहीर होण्याआधीच आम्ही ‘कमळ’ ही निशाणीच आज आमचा उमेदवार असे सांगत प्रचार सुरू केला आहे. उत्तर गोव्यातून विद्यमान केंद्रीय राज्यमंत्री श्रीपाद नाईक यांना उमेदवारी दिल्यानंतर त्यांनी आपल्या प्रचाराला गती दिली आहे. दक्षिण गोवा लोकसभा मतदारसंघातील भाजपचा उमेदवार उद्या किंवा परवा जाहीर होऊ शकतो.

दोन्ही मतदारसंघातील प्रचार कार्यालये आम्ही यापूर्वीच सुरू केली आहेत. त्याशिवाय प्रचार प्रमुखांचीही नियुक्ती केली आहे. मतदान केंद्र तसेच मंडळ पातळीवरील समित्यांच्या सदस्यांनी जनतेच्या गाठीभेटी घेणे याआधीच सुरू केले असून त्यांनी अशा भेटींचा पहिला टप्पा पूर्ण केला आहे. पहिल्या टप्प्यातच गोव्यात मतदान होईल असे गृहीत धरून आमची ही तयारी होती. आता आम्हाला प्रचारासाठी वाढीव कालावधी मिळाला आहे.