डिचोली: राज्यातील सीमारेषेवरील तपासणी नाके एकाच छताखाली आणून सीमेवरील (बॉर्डर) वरील सुरक्षा यंत्रणा सक्षम करण्यावर सरकारचा विचार आहे, असे मुख्यमंत्री डॉ. प्रमोद सावंत यांनी म्हटले आहे.

नवा साज देण्यात आलेल्या दोडामार्ग पोलिस चौकी इमारतीचे आज (रविवारी ) लोकार्पण केल्यानंतर मुख्यमंत्री प्रमुख पाहूणे या नात्याने बोलत होते. सार्वजनिक बांधकाम खात्यातर्फे 50 लाख रुपये खर्च करुन पोलिस चौकी इमारतीचे नुतनीकरण करण्यात आले आहे. कोणत्याही परिस्थितीत सरकारी जमिनींवर अतिक्रमण खपवून घेण्यात येणार नाही.

त्याविरोधात कारवाई करण्यात येईल. असा पुनःरूच्चारही मुख्यमंत्र्यांनी केला. या सोहळ्यास डिचोलीचे आमदार डॉ. चंद्रकांत शेट्ये यांच्यासह पोलिस महासंचालक अलोक कुमार, आयजीपी राहूल गुप्ता, जिल्हा पंचायत सदस्य प्रदीप रेवोडकर आदी उपस्थित होते. श्याम शिरोडकर यांनी स्वागत केले. प्रदीप रेवोडकर यांनी आभार मानले.

तपासणी सुलभ होणार

एका छताखाली तपासणी नाक्याचा प्रस्ताव मार्गी लागल्यानंतर सीमारेषेवरील तपासणी सुलभ होणार आहे. पत्रादेवी सीमेपासून ही योजना सुरु करण्यात येणार असल्याचेही मुख्यमंत्री डॉ. सावंत यांनी स्पष्ट केले.