वाळपई : सत्तरी तालुक्यातील सावर्डे पंचायत क्षेत्रातील काजरेघाट या ठिकाणी सोमवारी वास्को येथील दोन तरुण बुडाले होते. यापैकी शशी सोमनाळ या एकाचा तरुणाचा मृतदेह सोमवारी सापडला होता. मात्र गौरव सिंग यांचा मृतदेह अनेक स्तरावर शोधाशोध करून सुद्धा सापडला नव्हता. काल बुधवारी तिसऱ्या दिवशी सकाळी दुसऱ्या तरुणाचाही मृतदेह पाण्यावर तरंगताना आढळला.

काजरेघाट धबधबा परिसर हा धोकादायक असून सदर ठिकाणी पर्यटकांना बंदी घालावी, अशा प्रकारची मागणी स्थानिकांनी केली आहे. यासंदर्भात पोलीस आणि कर्मचाऱ्यांनी विशेष लक्ष द्यावे, अशा प्रकारची मागणी केली आहे. आमदार तथा मंत्री विश्वजीत राणे यांनी सुद्धा या धबधब्यावर पर्यटकांना बंदी घालावी, अशा प्रकारची मागणी केली आहे.

वास्कोतील आठ जण सहलीसाठी कोणीर धबधब्यावर येथे आले. अती पावसामुळे येथील पाण्याचा प्रवाह जोरात सुरू आहे. यावेळी शशी आणि गौरव हे दोघे सेल्फी फोटो काढत होते. या दरम्यान एकाचा पाय घसरला त्याला हात देत असताना दुसराही वाहुन गेला.

साेशल मीडियावर पाहून वास्कोतील तरुणांनी या धबधब्याची सहलीसाठी निवड केली होती. धाेकादायक ठिकाणी जाऊन सोशल मीडियावर फोटो टाकण्याच्या मोहापायी दोघांनी आपला जीव गमावला. शशी साेमनल हा एमएएस काॅलेजमध्ये तेरावीच्या वर्गात शिकत होता. तर गाैरव हा त्याच काॅलेजमध्ये अकरावीचे शिक्षण घेत होता.