डिचोली: आंघोळीसाठी दिवसेंदिवस असुरक्षित बनलेल्या हरवळे धबधब्याने (Harvalem Waterfalls) शुक्रवारी आणखी एक बळी घेतला आहे. सर्वत्र दसऱ्याचा उत्साह असतानाच, पावसाळी पर्यटनासाठी प्रसिद्ध असलेल्या या धबधब्यावर आंघोळीची मजा लुटण्यासाठी आलेल्या २१ वर्षीय युवकाचा दुर्दैवीरित्या बुडून मृत्यू झाला. अन्य एक जण बचावला. हरवळे येथे गेल्या सहा महिन्यांतील हा चौथा बळी ठरला.

अखिलेश जगदीश शर्मा असे या बुडालेला युवकाचे नाव आहे. तो वास्को येथील नौदल कॅम्प मध्ये राहत होता. अखिलेश हा एका नौदलाच्या अधिकाऱ्यासह आंघोळीसाठी हरवळे धबधब्यावर आला होता. दोघेही पाण्यात उतरले त्यांना पाण्याची अंदाज आला नाही. अखिलेश बुडला, त्याचा साथीदार बचावला. या घटनेची माहिती मिळताच डिचोली अग्निशमन दलाने धाव घेतली. अग्निशमन दलाचे अधिकारी श्रीपाद गावस यांच्या मार्गदर्शनाखाली राजन परब यांच्या नेतृत्वाखाली विशांत वायंगणकर, महेश नाईक, संदीप गावस आणि शैलेश साळकर या जवानांनी गळ टाकून मृतदेह पाण्याबाहेर काढला. पोलिसांनी पंचनामा करून मृतदेह उत्तरीय तपासणीसाठी बांबोळीयेथे पाठवला. दरम्यान, हरवळे येथे वाढत चाललेल्या बळींमुळे सरकारने येथे कडक उपाय योजना कराव्यात अशी मागणी केली जात आहे.