Omkar Elephant Spotted Goa Maharashtra Border : गोवा-महाराष्ट्र सीमाभागात पुन्हा एकदा ‘ओंकार’ हत्तीच्या हालचालींनी खळबळ उडाली आहे. ओंकार हत्तीने आपला मोर्चा पुन्हा गोव्याच्या दिशेने वळवत कळणे सडा येथे हजेरी लावली. बांदा राज्यमार्गावर त्याला पाहण्यासाठी नागरिकांनी मोठी गर्दी केली होती.

अनेकांनी त्याचे फोटो आणि व्हिडिओ मोबाईलमध्ये कैद केले. काही महिन्यांपूर्वीही ओंकारने गोव्याची हद्द ओलांडून स्थानिकांमध्ये आकर्षण निर्माण केले होते. विशेष म्हणजे, एकटाच फिरणारा ओंकार पुन्हा एकदा कळपापासून दूर झाल्याचे दिसून येत आहे.

तो सासोली परिसरात पोहोचला होता, तर उर्वरित पाच हत्ती दोन वेगवेगळ्या कळपांमध्ये विभागले गेले आहेत. त्यामुळे वन विभागाचे लक्ष या हालचालींकडे लागले आहे. दरम्यान, सावंतवाडी तालुक्यातील नेतर्डे परिसरात ओंकारने तळ ठोकल्याची माहिती समोर आली आहे. गोव्यातील हणखणे मार्गे त्याने या भागात प्रवेश केला.

काजू हंगाम सुरू असताना हत्तीच्या वावरामुळे शेतकऱ्यांमध्ये भीतीचे वातावरण पसरले असून, पिकांचे नुकसान होण्याची शक्यता व्यक्त केली जात आहे. वन विभागाने नागरिकांना सतर्क राहण्याचे आवाहन केले आहे.