काणकोण: काणकोण तालुक्यातील चाळीस वर्षांपूर्वी घातलेले बहुतेक वीज खांब गंजलेल्या अवस्थेत असून ते कोणत्याही क्षणी मोडून मोठी दुर्घटना होऊ शकते.सर्वाधिक वीज खांब खाऱ्या हवामानाचा परिणाम जाणवणाऱ्या किनारी भागात आहेत.

पाळोळे भागात अशा प्रकारचे धोकादायक वीज खांब असल्याचे ते त्वरीत बदलण्याची मागणी पाळोळे येथील गास्पार कुतिन्हो यांनी येथील सहाय्यक वीज अभियंत्याकडे केली होती. त्याप्रमाणे पाळोळे येथील एक गंजलेला धोकादायक वीज खांब वीज कर्मचाऱ्यांनी बदलला. त्याचप्रमाणे अन्य खांबही तातडीने बदलण्याची गरज येथील रहिवाशांनी व्यक्त केली आहे. काही खांब लोखंडी असून ते याच प्रमाणे गंजलेल्या अवस्थेत आहेत. त्याच्या जागी नवीन खांब बसवण्याची गरज आहे.

गालजीबाग, तळपण, राजबाग, ओव्हरे, पाटणे, पाळोळे, आगोंद या किनारी भागात भूमिगत वीज वाहिन्या घालून या प्रश्नाबरोबरच खंडित वीज पुरवठ्याचा प्रश्न सोडविणे गरजेचेआहे.आगोंद पंचायत क्षेत्रात किनारी भागातील पर्यटन व्यावसायिकांना खंडित आणि कमी दाबाच्या वीज पुरवठ्यामुळे त्रास होतो, असे कॉंग्रेसचे नेते जनार्दन भंडारी यांनी सांगितले. खंडित वीजपुरवठ्याची समस्या सोडवण्याची मागणीही त्यांनी केली.