Panchayat Conducts Inspection After Illegal House Numbering in Old Goa

तिसवाडी: जुने गोवे येथे बेकायदेशीरपणे २१ घरांना घर क्रमांक देण्याचा विषय प्रकाशात आल्यानंतर पंचायतीकडून पाहणी करण्यात आली. तिसवाडी गट विकास अधिकाऱ्यांच्या (बीडीओ) आदेशावरून पाहणी केली असता तेथे २०० मीटरची दोन जुनी बांधकामे आढळली.

पंचायतीने त्याची नोंद घेतली असून लवकरच अहवाल बीडीओ कार्यालयाला सादर केला जाईल. या पाहणीसाठी सरपंच मेघा पर्वतकर, उपसरपंच विश्वास कुट्टीकर, प्राभग पंचसदस्य सारिका नाईक, पंचायत सचिव सुबोध प्रभू, तक्रारदार ग्लेन काब्राल, मारियान फेर्रांव आणि जॉन मास्कारेन्हस उपस्थित होते.

बेकायदा घरांना घर क्रमांक देण्याचा विषय प्रकाशात आल्यानंतर यावर्षी जानेवारीमध्ये पाहणी करण्याची नोटीस श्वेता इस्टेटला बाजवली होती; परंतु बीडीओ कार्यालयात आव्हान दिल्याने पाहणी करता आली नव्हती. बीडीओनी सोमवारी सकाळी १०.३० वा. पाहणी करण्याचा आदेश दिल्यानंतर ती करण्यात आली.

यावेळी ग्लेन काब्राल यांनी सांगितले की, येथे कोणतीही घरे नसल्याचे पुन्हा एकदा स्पष्ट झाले. फक्त दोन जुनी बांधकामे येथे असून सुमारे २०० मीटरची ती असणार आहेत. आधुनिक तंत्रज्ञानाचा वापर करून जुने गोवेतील प्रत्येक प्रभागातील सर्वेक्षण करून, घरे मोजून त्यांची माहिती गुगल मॅपवरती टाकावी, जेणेकरून किती बेकायदेशीर घरे आहेत ते स्पष्ट होईल.

सखोल तपास व्हावा!

ज्या ठिकाणी घरेच नाहीत तेथे घरक्रमांक देण्याचा प्रकार हा धक्कादायक असून २००५ पासून चौकशी झाली पाहिजे. जुने गोवे जागतिक वारसा स्थळ असून येथे बांधकाम करण्यासाठी भारतीय पुरातत्व सर्वेक्षणाकडून परवानगी घ्यावी लागते. त्यात ‘सीआरझेड’ही लागू होत असल्याने कोणत्या आधारावर परवानगी दिली याचा सखोल तपास व्हावा, अशी मागणी जॉन मास्कारेन्हस यांनी केली.