जुने गोवा: भू-बळकाव प्रकरणातील मास्टरमाईंड आणि पोलिसांच्या कोठडीतून फरार झालेल्या सिद्दीकी उर्फ सुलेमान खान याच्या व्हिडिओ प्रकरणात आप नेते अमित पालेकरांना तिसऱ्यांदा समन्स बजावण्यात आला आहे. जुने गोवा पोलिसांनी पालेकरांना चौकशीसाठी हजर राहण्याचे आदेश दिले आहेत. सुलेमान खान आयआरबी कॉन्स्टेबलच्या मदतीने गुन्हे शाखेच्या कोठडीतून फरार झाला होता.

सुलेमान खान फरार झाल्यानंतर तो कर्नाटक असल्याची माहिती समोर आली होती. त्याला सुरुवातीला आयआरबी कॉन्स्टेबल आणि त्यानंतर आणखी एका व्यक्तीने मदत केली होती. दरम्यान, सुलेमानच्या अटकेसाठी प्रयत्न करणाऱ्या पोलिसांना त्याचा एक व्हिडिओ मिळाला होता. हा व्हिडिओ सुलेमान खानने सुरुवातीला आप नेते अमित पालेकरांना दिल्याचे उघडकीस आले होते. तर, काँग्रेस नेते सुनील कवठणकर यांनी हा व्हिडिओ सार्वजनिक केला होता.

सुलेमान खानने अमित पालेकरांनाच हा व्हिडिओ का दिला? याप्रकरणी त्यांची चौकशी केली जात आहे. याबाबत प्रथम सुनील कवठणकर यांची देखील चौकशी करण्यात आली होती. तसेच, पालेकरांची देखील दोनवेळा चौकशी झाली होती. दरम्यान, आता तिसऱ्यांदा याबाबत पालेकरांना समन्स बजावण्यात आला आहे. आज (०८ जानेवारी) सकाळी अकरा वाजता पालेकर यांना जुने गोवा पोलिस स्थानकात हजर राहण्यास सांगितले आहे.

सुलेमान खानला कोठडीतून फरार होण्यास मदत करणाऱ्या आयआरबी कॉन्स्टेबलला सेवेतून बडतर्क करण्यात आले. सुलेमानला फरार करण्यासाठी तीन कोटी रुपयांचा सौदा झाल्याचा आरोप केला जात आहे. तसेच, याप्रकरणात अनेक पोलिसांचा सहभाग असल्याचा आरोप सुलेमान खानने त्याच्या व्हिडिओच्या माध्यमातून केला आहे. दरम्यान, पोलिस सध्या या सर्व प्रकरणाचा सखोल तपास करतायेत.